Reportajen Celcia Magno
VENILALE (Lifaupress) : Ema kuaze atus ba atus iha Postu Administrativu Venilale, munisipiu Baucau, komemora Aniversariu Restaurasaun Independensia ba dala 23, Tersa (20/5/2025) iha Kampu Infantil Venilale, ho situasaun hakmatek no dignu.
Selebrasaun liuhusi serimonia Isar Bandera ne’e. nhodi hanoin hikas heroi martires sira nia luta ba ukun rasik an no halo reflesaun ba prosesu dezenvolvimentu nasional to’o ohin – loron .
Partisipante iha selebrasaun loron restaurasaun independensia ba 23 ne’e, kompostu husi autoridade, konvidadus, estudante husi eskola 27 iha teritoriu Venilale, Madre – padre no populasaun sira.
Entretantu Responsavel ba ichar bandeira fo fiar ba Eskola Sekundariu Jeral Venilale, no kapitaun da parada fo fiar ba Sarjento Polisia Juliao Guterres husi Eskuadra Polisia Venilale.
Prezidente Republika, Jose Ramos Horta iha nia diskursu ne’ebe lee husi Administrador Postu Administrativu Venilale, Jose Freitas Boavida hateten, timoroan hotu nafatin haksolok ho ukun an no haksolok mos ba lider sira husi rejiaun Sudeste Aziatiku, ne’ebe lakleur tan liuhusi enkontru lider ASEAN sei desidi simu Timor-leste sai membru pleno.
Tanba ne’e, Prezidente Republika husu ba Timor oan hotu kontinua moris iha paz no haksolok nafatin . “ Parabens ba povu no Estadu Timor Leste ba ukun an, durante tinan 23 ona,” nia dehan.
Nia mos frekunhese, durante era ukun rasik aan, progresu barak mosu no senti rasik husi povu. Progresu sira ne’e, tanba iha ona planu dezenvolvimentu nasional 2011 – 2030, ne’ebe givernu atualmente mos implementa.
Iha area saude, no edukasaun hatudu avansa signifikante. Timor-leste, tuir Prezidenti Horta investe osan barak ona ba dezenovilmentu iha area oioin.
Maske nune’e, durante restaurasaun Independensia, mosu mos problema sosial – politika, – ekonomia ne’ebe mos dada Governu nia atensaun.
Hafoin selebra loron Restaurasaun independensia ba dala 23 iha aprezentasaun grupu babadok Tebedai, hodi anima ambinete serimonia iha kampu eskola sentru infantil.
Alinde ne’e mos iha jogu oioin ba komunidade sira ne’ebe mak sai manan na’in hetan premiu husi komisaun organizadora.
Iha parte tuku tolu loraik, kontinua ho serimonia hatun Bandeira Nasional, hetan seguransa masimu husi Polisia Eskuadra Venilale. (*)
