Reportagen: Osterlia Muni
DILI -(lifaupress) : Assosiasaun Espoza/Espozu Polisia Nasional Timor Leste (AESPNTL) realiza komopetisaun Dansa Poco-poco, iha Jardim Largo Lecidere, Dili, Kinta feira (15/05/2025). Kompetisaun ne’e nudar parte ida husi atividade selebrasaun Aniversariu AESPNTL ba dala 2.
Prezidenti AESPNTL, Manuela de Araujo ba jornalista sira esplika, hateten kompetisuan ne’e, atu hametin amizadu no unidade entre membru sira no komunidade. “ AESPNTL hakarak hamahon parseiru kaparseira sira iha naroman ho unidade,” Prezidenti AESPNTL, Manuela de Araujo hateten.
Antes ne’e, AESPNTL hala’o ona atividade Missa agradesimentu iha loron 27 Abril 2025, seminariu Nasional (6 Maiu 2025) asaun karidade, no asaun karidade ba iha komunidade no membru PNTL ne’ebe moras,inklui pasiente iha hospital sira.
“ Durante tinan rua ne’e, AESPNTL mos halao atividade iha munisipiu sira. Vizita komunidade no membru sira ne’ebe moras no labele ba konsulta iha fasilidae saude sira, nuudar ami-nia papel, hato’o hato’o fali ba Komando PNTL hodi foti desizaun situasaun no kondisaun sira ne’e, “ nia esplika tan.
Hatan ba atividade sira ne’e, Komandente Jeral PNTL, Komisariu Jeral Polisia, Henrique da Costa hateten, prezensa AESPNTL desde nia ezistensia iha 27 Abril 2023, kontribui pozitivu tebes ba PNTL niaserbisu, liuliu atividade sosial.
“ Presiza kria tan regulamentu atu haforsa tan AESPNTL nia atividade,hodi apoiu servisu Polisia. Presiza iha apoiu orsamentu husi Governu ba atividade sira, “ Komjer Henrique da Costa hateten.
Rekruta Polisia Foun
Iha parte seluk, kona-ba rekrutamentu membru polisia foun, Komandante Jeral Polisia esplika, orsamentu Jeral PNTL tinan 2025, koloka osan ba rekrutamentu Polisia foun.
“ Ita hato’o ona regra sira ba Ministeriu Interior. Maibe parte juridiku sei hare. Bainhira aprova ona, mak foin bele inisia prosesu rekrutamentu polísia foun,” Komandente Jeral PNTL Komisariu Jeral Henrique Da Costa dehan ba jornalista sira iha Dili, Kinta-feira (15/05/2025).
Fulan Marsu 2025 liuba, halo ona promosaun deviza kuaze 90%, husi membru PNTL benefisia ba promosaun tranzitorio no promosaun antividade iha PNTL.
“ Munisipiu barak realiza espozisaun promosaun deviza no munisipiubalun sedauk. Bainhira remata espozisaun divisa, sei hare kolokasaun hodi prense estrutura sira,” Komjer Henrique da Costa esplika.
Tuir Lei organika foun, iha Diresaun Polisia Komunitario, Diresaun investigasaun no Diresaun servisu formasaun Polisia. “Ita sei aloka ema atu asume kargu iha Diresaun sira-ne’e,” nia dehan tan. (*)
