Reportagen: Osterlia Muni
DILI- ( Lifaupres): Membru Polisia Nasional Timor-leste (PNTL) na’in 64 iha Centro Formasaun Polisia (CFP) hetan promosaun deviza tranzitoria bazeia ba Lei Organiku PNTL no Dekretu Lei numeru 34/2024.
Husi membru PNTL na’in 64 ne’e, feto na’in 11 no mane na’in 53, mauhusi deviza Superiór nain 4, Inspetor Xefe (11), Inspetor (4), Inspetor Asistente (16), Sargentu Xefe (5), Primeiru Sargentu (1), Agente Xefe (17) no Agente Prinsipal na’in 10.
Segundu Komandante Jeral Polísia Nasionál Timor-Leste (PNTL), Komisariu Pedro Belo, iha serimonia ne’ebe halao Kuarta- feira (14/05/2025) iha CFP Comoro, Dili, hateten, promosaun deviza ne’e nudar ponte motivador no inspirasaun, atu hametin etika servisu ba membru PNTL iha CFP no ba povu tomak,.
“Ho kualidade treinamentu, hadia kadetes foun no rekruta ba iha kuinesimentu no abilidade kona-ba kna’ar no dever iha instituisaun Polísia Nasional Timor-Leste no ba nasaun Timor-Leste, ” Komisariu Pedro Belo dehan.
Nune’e, Komisariu Pedro Belo husu ba formador sira atu iha dever no obrigasaun, forma karakter no etika ba kadetes, kuda valór honestidade, dixipliña no responsabilidade no respeita lei Instituisaun PNTL.
“Ha’u husu ba membru idak-idak atu iha vontade, halo sakrifísiu no dedikasaun tomak. Ita – boot sira sai exemplu diak ba rekrutamemtu kadetes foun, atu sira iha kuinesimentu no abilidade ho idak-idak nia atividade no hahalok,” nia dehan tan.
Nia mos rekunhese, membru Polisia hotu hein atu hetan promosaun tranzitoria, maibe nunka akontese. “ Maibe ho imi nia pasensia, ohin – loron instituisaun PNTL konsege realiza ona promosaun tranzitoria ba imi hotu,” eis Komandan Polisia Munispiu Dili no mos Komandante Operasional PNTL ne’e reafirma .
Komando Geraj PNTL husu membru sira ne’ebe simu promosaun deviza tranzitoria, atu mantein nafatin dixipliña no kredibilidade. Iha nafatin responsabilidade ba povu no nasaun nia konfiansa, ne’ebé tula idaidak nia kabas hodi servi rai no povu ida – ne’e.
“Imi, nuudar Formador , kontinua aprende siénsia kona-ba Polísia hodi dezenvolve imi-nia kapasidade koppera, kolabora no lidera dezenvimentu instituisaun PNTL ba futuru ho diak,” Komisariu Pedro Belo husu.
Entretantu Komandante Sentru formasaun Polísia (CFP), Superintendente Polísia Nuno Dos Santo, mos rekunhese Sentru formasaun Polísia importante tebes nuudar fatin ba kapasitasaun membru PNTL sira, atu servi instituisaun PNTL ho di’ak ba futuru. (*).
