Reportagem : Rosita Taec Tilo
Asosiasaun Estudante DIT-KREO Periudu 2026-2027 ne’ebé prezidi husi Joao Baptista Elo simu pose husi Diretór DIT-KREO, Dr João Muni, loron 14 Fevereiru 2026 iha Kampus Palaban, Costa, Panta Makasár.
Prezidente Asosiasaun Estudante DIT-KREO Periudu 2026-2027, Joao Baptista Elo iha nia diskursu hato’o agradesimentu ba instituisaun (DITKREO), Diretur, estrutura DIT KREOA tomak no kolega estudante hotu, tamba fo ona konfiansa nudar Presidente DITSA-KREO tinan akademika 2026-2027.
“ Mai ita hamutuk hodi serbii ho fuan ba atividade hotu iha Instutuisaun ne’e. Organizasaun ne’e, sei sai ponte komunikasaun entre estudante no estrutura DIT-KREO. Senadu nia ezistensia atu asegura mos instituisaun nia servisu hotu, hodi garante kualidade edukasaun,” João Batista Elo dehan.
Durante mandate 2026-2027, sei hala’o programa internal no esternal. Programa internal sei kompostu husi prioritiza Teknolojia ho atividade fo oportunidade ba estudante DITKREO hodi asessu hotu ba sala lab/komputador, loke rental iha Instituisaun DITKREO, hodi fasilita estudante sira atu imprime dokumentu ka traballu ruma, palestra sentifiku ho orador husi peritus sira, limpeza jeral iha area kampus DITKREO, kada sexta feira no halakon diskriminasaun, hametin unidade.
Entretantu programa esternal kompostu husi prioritize Igreja ou Relijioza liuhusi atividade estudante no funsionariu DITKREO simu responsabel koru ba serimonia liturjia sira ba Igreja ba Misa Domingu, Natal, Tinan Foun no Paskua.
Alemde ne’e, halo programa orasaun dader tuku 08 : 00 no meudia tuku 12 : 00, serimonia hasa’e Bandeira Nasionál primeira semana kada fulan, partisipa loron importante ou loron nasional, Sosializa instituisaun DITKREO ba Ensino Sekundária no Tekniku Vokasional sira, inklui Instituisaun Guverno no Non Guvernu, Kada departmentu fahe informasaun iha eskola ho-hotu, liu-liu departmentu Computer Science (CS) , tau matan ba fatin importante sira atu halo limpeza no kuda ai-oan iha fatin (Turismo, Relijiosa, no kultura) no promove fatin turizmu sira iha teritoriu RAEOA, halo Kompetisaun Diskursu Publiku no Debate Publiku entre departementu no entre DITKREO ho universidade seluk, atividade desportivo, jogu amizade hanesan futebol, voliball feto – mane iha instituisaun DITKREO jogu ho eskola sekundária no instituisaun seluk.
Alemde ne’e, iha mos atividade Arte no kultura , liuhusi estudante DIT- KREO tenki aprende dansa tradisional no estudante feto sira aprende halo tais tradisonal.
Entretantu Prezidente Sesante Dili Institute of Technology Student Association Kampus Regional “Enclave” Oe-Cusse, DITSA-KREO/ Xefe Senadu Sesante, Abelino Nebe Tilo mós hato’o obrigadu ba Diretór DITKREO Dr, Joao Muni ne’ebe suporta atividade sira durante mandatu, inklui fasilita Motorizada Ida.
Nia mós agradese ba membru estrutura sesante ne’ebe fo apoiu malu, maske hasoru problema barak.
Nia informa, durante tinan Ida hasoru problema planu atividade 2023-2024 seidauk implementa, fasilidade komputador la iha no ladun hetan kolaborasain di’ak.
“Ita hasoru problema maka finansas. Dalaruma meneja deit osan kartaun extra Kurikuler ho kartaun Bibleoteka, maibe dala ruma mos hetan apoiu makaas husi Kampus,” Nia dehan.
Kona-ba planu 2023-2024 Nia dehan ,” Planu Sira nee atu entrega ba ha’u, maibe, lai iha. Entaun susar atu dezenvolve buat ruma ba rstudante sira – nia preokupasaun iha DITKREO.”
Kona-ba fasilidade komputador, Nia dehan, durante ne’e uza deit komputer privadu. ” Maibe nu’udar estudante DITKREO nafatin ofrese hau -nia an hodi apoiu kampus ida -ne’e,” Nia afirma. Alende nee, kolaborasain entre estudante susar, tanbá diskrimina malu.
” Senadu ne’eba maihusi Estudante Departamentu ida, entaun estudanten husi Departamentu seluk la apoia, idak – idak Lao ketak. Entaun atu halo ka ezekuta buat ruma, susar boot atu hetan rezultadu di’ak,” nia dehan. (*)
