Reportajen : Imaculada Tefa
Xefe Gabinete Prezidente Autoridade Rejiaun Administrativa Espesiál Oe-cusse Ambeno (RAEOA), Joao Bano Suni husu ba estudante iha Ensinu Superior sira iha rai Oe-cusse, atu abitua lee livru no sell-seluk tan, nune’e hatene buat barak, aumenta matenek no abilidade iha prosesu aprendijazen.
Xefe Gabinete Prezidente Autoridade RAEOA, Joao Bano Suni hato’o ida – ne’e liuhusi ninia diskursu iha serimonia abertura orientasaun tinan Akademika 2026 ba estudante iha Kampus Dili Institute of Technology Kampus Rejional Enklave Oe-kusi Ambenu (DITKREO), Palaban, Pante – makasar, Segunda-feira (9/2/2026).
“ Ha’u sente triste, bainhira haree alin sira hahú husi Pre-Eskolar to’o Universidade, nunka lee livru, inklui lee lingua sira. Lingua husi nasaun seluk, nuudar instrumentu hodi bele aprende siensia no teknolojia hotu, ne’ebe ema matenek sira hakerek ona,” nia hateten.
Nafatin tuir Xefe Gabinete PA RAEOA, “ Se ita lakon tempu durante tinan haat iha eskola ka Universitariu, nunka lee, ne’e oinsa ho ita – nia future? Sei estudante sira la Lee, oinsá atu matenek? Livru ne’e la’os pajina de’it, maibe nuudar pasaporta ba future. Nune’e, tenke dudu imi – nia aan rasik ba oin.”
Emtretantu, Diretór Dili Institute of Technology KREOA, Joao Muni mós observa, estudante sira sira iha era agora, ladún abitua hodi lee, la’os de’it iha Oe-cusse maibé kuaze mundu tomak.
“Problema ne’e kuaze nasaun tomak, tanba mudansa husi teknolojia komunikasaun no siensia Teknolojia. Maske nune’e, estudante sira tenki pasa tempu hodi bele lee, liu-liu Universitariu sira, hodi aumenta matenek,” nia dehan.
Atualmente, DITKREO servisu hamutuk ho Operador telekomunikasaun Telkomcel, monta Internet iha Kampus, hodi fasilita estudante sira iha asesu ba Siensia iha plataforma dijitalizasaun. “ Karik Kampus falta livru iha bibliotkea, estudante sira bele asesu siensia liuhusi media sira,” nia dehan. (*)
