Reportajen : Imaculada Tefa
OEKUSI (lifaupress) : Ensinu Superior Dili Institute of Technology (DIT) Kampus Rejional Enklave Oe-cusse (KREO) orienta estudante foun hamutuk 110. atu kuñese no hadomi ambiente. Tanba, ambiente moos no buras, fo moris saudavel ba ema hotu.
Orientasaun hadomi ambiente ne’e. parte ida husi atividade orientasaun ba estudante foun Tinan Akademiku 2026 ne’ebe sei hala’o durante loron lima. Abertura ba tempu orientasaun ne’e hahu ona iha loron Tersa-feira (9/2/2026) liuba.
Tuir Diretór DITKREO, Joao Muni orientasaun ba estudante foun sira Tinan Akademiku 2026 ne’e, ho objetivu atu iha inisiu estudante sira buka hatene iha fatin ida – ne’e, maka tenke hatene ambiente Kampus, prosesu Akademiku, prosesu rekursu umanu, Administrasaun no seluk tan
Orientasaun tinan ne’e hili tema “ Rikusoin loloos mak ita – nia rekursu umanu. Tanba ne’e investe iha kapitál umanu hodi dezenvolve Timor-Leste iha future.”.
“Nune’e liuhusi orientasaun ne’e, ita orienta sira hodi bele sai ema ne’ebe iha konsentrasaun ba Departamentu, ne’ebe sira hili ona iha DITKREO ne’e. Iha kuñesimentu ba sira – nia area rasik no ambiente DITKREO nian. Nune’e bele prepara sira – nia rekursu ne’ebe ho di’ak, hanesan Universidade,” Joao Muni dehan iha Kampus DITKREO, Palaban, Costa, Panta Makasar, Segunda-feira (09/02/2026).
Durante orientasaun, iha atividade importante tolu. Primeiru, koñese Instituisaun Kampus tomak. Segundu, haforsa patriotizmu no nasionalizmu liuhusi diskursu, formasaun no formatura marka pasu no datoluk, hadomi Ambiente buras iha Kampus.
Nune’e mós orienta sira, bainhira iha komunidade nia leet, estudante sira tenki hatudu karate hadomi ambiente moos, sustentavel no saudavel ba ema hotu, labele so’e fo’er arbiru no tenki hadia eskola ho di’ak.
Entretantu Prezidente Komisaun Organizadora ba OSPEK Kampus Rejional Enklave Oe-kusi, Octoviano Babu Colo hato’o ben-vindu ba estudante foun sira ne’ebe hili tama ba Knua DITKREO. “ Agradese ba familia nia suporta no apresia sira – nia inisiativa hodi kontinua estudu iha nivel ensinu superior iha Knua DITKREO,” Octaviano hateten.
DITKREO, nia haktuir, mak sentru hodi rezolve ema hotu nia preokupasaun, liu-liu iha area edukasaun. “ Mai luta hamutuk no duni tuir saida mak ita mehi. Aproveita didi’ak oportunidade ida – ne’e. Orientasaun ne’e atividade simples, maibé nia benefisiu boot tebes ba ita,” nia dehan tan.
Kandidatu estudante foun tinan akademika 2026, ne’ebe maka partisipa iha atividade ida ne’e, ho total nain-110, ne’ebe kompostu husi Departamentu haat(4) maka hanesan Departamentu Jestaun Jeral, Jestaun Finansas, Computer Science no Civil Enjinering.
Alemde atividade fizika, durante orientasaun sei iha mos atividade non fiziku liuhusi palestra husi parte relevante, hodi fahe sira – nia esperiensia hodi aumenta estudante foun sira-nia konhesimentu. (*)
