Reportajen: Selestinho Mani Falo
DILI (Lifaupress) Universidade Nasional Timor Lorosa’e (UNTL) liu husi Fakuldade Edukadaun Arte no Humanidade (FEAH), Kinta-Feira (27/06/2024), realiza semana arte kultura tinan 2024 iha kampus Liceu, UNTL Dili, ho tema jeral, “Kultura mak ita nia identidade no valor moris”, atu valoriza kultura Timor-leste.
Prezidente Komisaun Organizadora, Julio Maia da Conceição hateten, atividade semana kuktural ne’e hahú tinan 2017. Maibe to’o tinan 2019 para tia, tanba mosu Covid-19.
Atividade ne’e, foin realiza fali iha tinan 2023. “ Kada tinan sempre halo,” Prezidente Komisaun organizadora, Julio Maia da Conceição esplika ba jornalista www.lifaupress.com iha ambiente fatin serimoñia semana kultural, kampus FEAH-UNTL, Liceu, Dili.
Objetivu husi atividade loron tolu (27-29 Juñu 2024), ne’ebe partisipa husi Departamentu 10 ne’e, atu hametin lasu amizade entre estudante sira, liuliu iha Fakuldade Edukasaun Arte Humanidade.
Modalidade 5 mak aprezenta ha atividade ne’e, komposu husi dansa tradisional, diskursu públiku, muzikal koral, poema no tein ai-han tradisional monu ba loron 29 Juñu 2024.
Ba susesu atividade ne’e, Komisaun Organizadora hetan apoiu husi UNTL US $ 2,000. Ba manan na’in primeiru lugar ba kompetisaun poema no diskursu públiku ida-ida hetan osan USD 60, sengundu lugar (US $ 50) no terseiru lugar hetan osan US$ 30. Entretantu ba modalidade 3 seluk, primeiru lugar hetan osan US$ 200, segundu lugar (US $ 150) no terseiru lugar hetan osan US $ 100.
“ Ami mos estabelese relasaun ho Ministeriu Turismu, Ministeriu Agrikultura, instituisaun privadu no internasional sira, atu fó apoiu,” nia dehan tan.
Entretanu juri ba kompetasaun ne’e maihusi SECA UNTL ba juri dasnsa tradisional, MOP ba diskursu públiku no poema no juri ba kompetisaun muzikal no te’in ai-han tradisinal maihusi dosente FEAH.
Vise Dekanu asuntu akadémiku, Venancio Lopes haktuir, FEAH sei kontinua promove kultura Timor-leste kada tinan, inklui tinan ida ne’e hodi hadau mos Tasa FEAH ba dala V.
“Kultura nuudar identidade ba nasaun. Nune’e ami promove sai programa annual ba estudante FEAH sira hotu,” nia afirma.
Entretantu membru grupo dansa tradisional husi departamentu Ensinu Lingua Inglesa, Andrea da Costa Lourdes agradese ba estrutura FEAH no komisaun organizador, tanba servisu maka’as hodi realiza atividade Semana Kultural Tinan 2024.
“Ha’u kontenti tebes ba atividade ne’e, tanba bele promove ita – nia kultura Timor-leste no hanorin jerasaun foun sira atu labele halakon identidade kultura Timor nian,” nia hakotu.
Tuir observasaun jornalista www.lifaupress.com abertura ofisial ba atividade semana kultural FEAH-UNTL tinan akadémika 2024, hala’o husi husi vise dekanu assuntu akadémika FEAH, Venancio Lopes. (*)
