Reportajen: Selestinho Mani Falo
DILI (Lifaupress) : Estudante semestre VII na’in 618 husi Fakuldade Edukasaun, Arte, Humanidade (FEAH), Universidade Nasional Timor Lorosa’e (UNTL) tinan akadémika 2024, sei hahu estajiu pedagojia iha segundu semana fulan Jullu 2024.
Estudante sira ne’e maihusi Departementu 10 iha FEAH, kompostu husi feto 328 no mane na’in 290, sei koloka ba munisipiu 12 no Reiaun Administrativu Espesial Oe-cusse Ambrno (RAEOA).
Vise Dekanu asuntu akadémika FEAH-UNTL, Venancio Lopes iha forma asuntu ne’e ba jornalista www.lifaupress.com, Sexta-Feira (28/06/2024) iha sala Vise Dekanu Akadémika FEAH-UNTL Liceu, Dili.
Nia haktuir, estudante sira ne’e sei fahe munisipiu Dili na’in 227, Baucau (76), Ermera (69), Manufahi (41), Manatutu (35), Ainaro (29), Liquiça (30), Aileu (28), Lautem (25), Vikeke (23), Covalima (19), Bobonaro (18) no RAEOA na’in 22.
“ Estudante sira sei pratika sira-nia teoria no esperensia ne’ebe sira aprende ona durante estuda iha universidade,” Vise Dekanu FEAH dehan.
Universidade sei desloka estudante sira ba fatin estajiu iha loron 10-12 Jullu 2024. Estajiu nee sei hala’o durante fulan, hahu Jullu to’o Dezembru 2024. Autoridade edukasaun munisipal no RAEOA mak sei aloka ba eskola sira, tuir estajiadu sira hili tia ona.
Nia mos rekunhese, estudante barak mak rezigna-an, tanba seidauk kompleta dokumentu no mos balun hakarak muda estajiu fatin.
“Ami nia ekipa mos dadauk ne’e hala’o hela kooperasaun ho Edukasaun Munisipiu atu komfirma Diretor Eskola sira, hodi enkontru no koordena preparasaun simu estajuadu sira”, nia salenta.
Kona-ba nesesidade aihan no hela fatin, FEAH laiha kbi’it atu fasilita. Nune’e estajiadu sira mak hili rasik eskola, atu besik sira-nia familia, hodi sustenta ai-han no hela fatin. (*)
