Reportajen: Ana Graciana Soares
DILI (Lifaupress): Timor-Leste Press Uniaon (TLPU), Kinta-feira semana ne’e hato’o karta protestu ba Prezidente Autoridade Rejiuan Administrativu Espesiál Oé-Cuse no Ambeno -RAEOA, Rogério Tiago Lobato, relasiona ho tratamentu ba Jornlaista durante serimonia asina Memorandu Intendementu hari Mezeu Tais iha Oe-cusse, loron 4 Juñu 2024.
Hanesan publika ona liuhusi Meius Komunikasasun Sosial sira iha Timor-leste, loron rua ikus, Pesoal protokolu RAEOA, Aquito Roxaca Guterres dada ho maka’as, jornalista Tatoli, Abilio Lelo Nini durante serimonia ne’e, tanba halo kobertyura besikliu fatin asinatura Memorandu ne’e.
Sekretariu Jéral TLPU, Sezito da Silva hatete, iha karta ba Prezidente Autoridade RAEOA ne’e, TLPU hato’o lamentasaun no husu Prezidente Autoridade RAEOA atu fó xamada atensaun ka demite servisu pesoal protokolu.
” Protokolu ne’e limite jornalista nia servisu iha terenu, hodi dada monu no koko atu tuku jornalista. Ne’e ami protesta maka’as,” Sekretariu Jéral Sezito da Silva ba jornalista sira, hafoin hatama karta ba Sekretariadu RAEOA iha Timor Lodge, Dili (05/6).
Iha Lei komunikasaun artigu 41.º ko’alia kona-bá atentadu ba liberdade informasaun, hateten ema sivíl ka funsionáriu públiku ka ajente Estadu, ne’ebé impede servisu jornalista ka komete atentadu ba liberdade imprensa, sei hetan kastigu ho pena-prizaun to’o másimu tinan-tolu ka multa.
“ Bazeia ba Konstituisaun RDTL artigu 40 no 41 no mós lei komunikasaun sosiál artigu 8 º no 41.º maka TLPU lamenta no kondena atetude pesoál protokolu RAEOA), ne’ebé rasta monu no tenta atu tuku tán jornalista Agência Notisioza Timor-Leste, Institutu Públiku, TATOLI, IP, Abílio Elo Nini.
Sekjen TLPU mos afirma, la respeita jornalista nia servisu nuudar tentaiva ameasa liberdade imprensa. Aktu ida – ne’e, nuudar indikador ida atu halo grave liu tan ranking Liberdade Imprensa iha mundu,
Kazu ne’e akontese iha otél Ambeno, iha loron-tersa, 4 juñu 2024, tuku 17:00 lokoraik, iha ámbitu serimónia akordu entre Autoridade RAEOA Rogério Tiago Lobato ho Timor Aid, atu estabelese Muzeu Tais Timor iha Oé-Cusse Ambeno. (*)
