Reportagen : Osterlia Muni
DILI – (Lifaupress): Sekretaria Estadu Formasaun Profisional no Empregu (SEFOPE) Timor-leste, Terca feira,(15/04/2025) organiza rekonsultasaun ba publiku kona-ba esbosu salario minimu nasional Timor Leste iha salaun Novo Turizmu Dili, hodi halibur ideia sira ba salariu minimu, molok aprezenta ba Konsellu Ministru.
Diretor Jeràl Formasaun Profisional no Empregu (SEFOPE), Carlito do Rosario Cabral ba joralista sira hafoin rekonsultasaun ne’e esplika, liuhusi rekonsultasaun ne’e, reforsa tan informasaun ruma hodi finaliza testu esbosu salariu minimu nasional.
” Ami tenke iha informasaun relevante sira kona-ba salariu minimu, nune’e bele justifika bainhira aprezenta ba Konselu Ministru atu hetan apresiasaun ka aprovasaun,” Ditetor Carlito do Rosario Cabral.
Iha parte seluk, Diretor Jeral ne’e mos informa kona-ba Timor – Leste ho nasaun Nova Zelandia preparadu atu assina akordu kona-ba haruka traballador timoroan ba Nova Zelandia.
“ Antes asina akordu, prosesu diskusaun la’o diak tebes. Iha tempu badak, sei assina akordu ida ne’e, atu haruka joven sira ba serbisu iha Nova Zelandia,” Diretor Ditetor Carlito do Rosario Cabral.
dehan tan.
Atu realiza asina akordu ne’e, ekpa ida husi Nova Zelandia sei mai Timor-leste halo diskusaun hamutuk, hodi prepara ba mobilidade laboral, prioridade iha area agrikultura.
Entretantu Prezidenti KSTL, Aveiro Vila Nova hatete, tuir akordu ne’ebe iha, kada Tinan rua tenke halo revizaun ba salariu minimu Nasional. “ Tuir lolos ita halo ona revizaun iha 2014. Maibe infelizmente la akontese,” nia dehan.
Nafatin tuir Aveiro Vila Nova, salariu minimu Nasional nudar kestaun politika, ne’ebe nia desizaun mos desizaun politika. “ Ita bele esforsu halo oioin, maibe depende ba politiku sira Mak deside montante salario minimu ne’e.”
Tinan kotuk, SEFOPE halo esforsu aprezenta ona ba Konsellu Ministru kona-ba nominal salariu minimu nasional ho montante $150, tanba salariu minimu $ 115 la sufente ona. Maibe, enfelizmente Konsellu Ministru rejeita proposta ne’e.
Tuir KSTL, nominal salariu minimu $ 150 ba traballador nasional, ne’e dignu no ajuda tebes ema atu moris iha kondisaun naton, no hases aan husi linha pobreza.
Antes ne’e, rezultadu peskiza hatudu hatudu nominal salariu minimu iha Timor-leste tenki $ 167. Maibe tanba hare ba kondisaun no kapasidade empreza iha Timor-leste, entaun desidi salariu minimu mak nominal $ 150 kada fulan, hodi propoin ba Governu liuhusi Konsellu Ministru.
” Salario minimu ne’e atu fo protesaun rendimentu ba trabalador sira, ne’ebe kategoria vurneravel. Salariu minimu $ 115 kada fulan ate agora, risku tebtebes, tanba bele tama iha linha pobreza no monu ba ki’ak,” Prezidenti KSTL reafirma.
Tanba realidade mos hatudu, trabalhador sira la’os moris mesak, maibe iha mos feen – oan. Tinan barak ona, ema moris iha situasaun difisil, tanba la konsege absolva nia ekonomia no nesidade iha uma laran. Labarik Sira la hetan nutrisaun no di’ak no la iha kapasidade asesu edukasaun di’ak.
Tanba ne’e, tempu to’o ona atu lori fila -fali esbosu Dekreitu Salario minimu ho montante 150 ba Konselu Ministru, atu diskuti no hetan aprovasaun.
Esbosu Dekreitu salario minimu ne’ebe sei aprezenta, regula setor privadu, kooperativa no setor serbisu sosiais.
Partisipante iha rekonsultasaun salario minimu ne’e maihusi Ministeriu relevante sira, Sosiedade Sivil, CCI-TL, KSTL, Ministeriu finansa no MCI, hodi fo hanoin kona-ba situasaun no kondisaun atual. (*)
