Reportajen: Selestinho Mani Falo/ Maria Feno/ Osterlia Muni
DILI (Lifaupress) Sekretáriu Estadu Formasaun Profisionál no Empregu (SEFOPE) liuhusi Diresaun Nasionál Empregu (DNE), Tersa-Feira (03/06/2024) halo abertura ba koresaun materia teste eskrita ba vaga online ba partisipante na’in 40.264, iha salaun Beach Garden Pante Kelapa, Dili.
Sekretáriu Estadu Formasaun Profisionál no Empregu (SEFOPE), Rogerio Mendonça hateten, koresaun materia ezame ba teste vaga online lian Inglesa sei halo durante semana ida.
“ Karik koresaun seidauk hotu, sei estenda tan loron rua”, Sekretáriu ba Estadu Formasaun Profisionál no Empregu (SEFOPE), Rogerio Mendonça ba jornalista sira iha salaun Beach Garden Pante Kelapa, Dili.
“Númeru partisipante teste vaga online boot tebes. Teste ne’e liu fulan rua ona. Ita tama bafaze koresaun. Apresia DNE ho Governu Australia liuhusi PLF, ne’ebe apoia atividade koresaun nee, ” nia dehan.
Oitavu Governu husik hela kandidatu rihun 55 resin iha sistema. Tranzisaun husi Governu ida ba Governu seluk, ne’e hanesan kontinua servisu.
” Ema sira ne’ebe halo koresaun ne’e hamutuk na’in 80 no sira reprezenta husi diretor SEFOPE munisipiu 13. inkliu RAEOA, husi DNE no mos PFL”, nia esplika.
Nia husu ba ekipa hotu tenke esforsu no la’o ho kondisaun ne’ebe diak no garantia katak semana ida nee koresaun hotu atu nune’e fó sai ba públiku ho dignu. “Bá ekipa koresaun sira hotu, tenki kuriji ho kualidade no tranparante, “ nia dehan
Entretantu reprezentante Embaxador Australia iha Timor-leste, Peny Roberts haktuir, prosesu teste eskrita ne’e hahú iha Reziaun Administrativu Espesial Oe-cusse Ambenu (RAEOA), ne’ebe hahu ho sakrifisiu tanba hasoru ema barak. Maibe liuhusi esforsu boot tebes, ohin – loron dala ida tan abertura ba koresaun teste eskrita ba vaga online.
“Ha’u agradese tebes ba SEFOPE , mantein komponente transparensia no kredibilidade,involve instituisaun sira ne’ebe asegura komponente hira ne’e no enkorajem ba partisipante koresaun sira, atu uza enerjia tomak no esforsu hotu remata tia servisu ne’e ho di’ak “, nia dehan. (*)
