Reportajen: Ana Graciana Soares
DILI (Lifaupress): Bolseiru Hakbi’it iha Institutu João Saldanha – IJS, kontra desizaun husi Governu Konstitusional dasia, liuhusi Fundu Dezenvolvimentu Kapitál Humanu (FDCH) muda bolsa hakbi’it ba parsiál, la iha kordenasaun ruma ho bolseiru sira.
Bolseiru Hakbi’it iha Institutu João Saldanha hato’o deklarasaun ne’e , liuhusi konfernesia imprensa, Kuarta-feira (03/07/2024) iha Jardin 5 de Maio, Colmera, Dili.
KONFERENSIA IMPRENSA : Bolseiru Hakbi’it hala’o Konfernesia imprensa, Kuarta-feira (03/07/2024) iha Jardin 5 de Maio, Colmera, Dili, protesta design IX Governu. Foto LP/Anagracia
“Bolsa integrál ka hakbi’it ne’e, tulun tebes ami kbi’it laek nia oan sira hodi bele asesu ba Ensinu Superiór. Tanba ita hotu hatene, kontinua estudu iha Dili, kapitál nasaun, la’os deit selu eskola, maibé presiza mós sosa ai-han, selu kós, selu bemo, sosa livru, pulsa eletrisidade, internet, Print, fotokópia no nesesidade sira seluk, “ Porta voz I Bolseiru Institutu João Saldanha, Julito Orlando de Sousa afirma.
Tuir bolseiru sira, durante ne’e Bolsa integrál ka hakbi’it, fasilita estudu estudante kbi’it laek sira ho di’ak, ne’ebe bazeia ba kontratu to’o tinan-lima.
IX Governu Konstitusional liuhusi diploma ministeriál Nu. 11/2024 de 7 de Fevereiru, deside halo mudansa bolsa hakbi’it ba fali bolsa parsiál.
“Desizaun ida ne’e, tuir ami injustu teb-tebes no sei la tulun ami kbi’it laek nia oan sira, atu bele asesu ba Ensinu Superiór iha Timor Leste. Konsekuensia seluk husi desizaun ne’e, mak lori ami tama ba rai-ku’ak. Tanba ami – nia esudu iha dalan klaran ona. Inan – aman kbi’it la iha hodi sustenta ami atu kontinua ami – nia estudu,” bolseiru ne’e deklara tan.
Efeitu seluk, tuir Porta voz ne’e, bolseiru rihun ida resin abandona ona estudu, tanba kestaun laiha kapasidade finanseiru hodi kontinua eskola no moris sustentavel iha kapaital Dili.
“Ho kondisaun hirak ne’e hotu, ami nu’udar povu kbi’it laek nia oan, hanesan benefisiariu senti lakon ona esperansa atu kontinua ami – nia estudu iha banku universidade,” benefisiariu ne’e dehan tan.
Nune’e husu Konsellu Ministru halo rekursu ba dezisaun injustu ne’ebe manifesta iha diploma ministeriál Nu. 11/2024 de 7 de Fevereiru.
” Ami totalmente la konkorda no sei la asina karta kontratu foun bolsa hakbi’it, muda ba bolsa parsiál ne’ebé FDCH atribui ona ba kada Universidade ho data ne’ebé determinadu,” Julito dehan.
Estudante bolseiu sira mos konsidera, Governu la halo diskusaun no sensibiliza ruma, kolega planu mudansa ne’e.
“Iha VIII Governu Konstotusional, FDCH marka prezensa ba kada Universidade, hodi sensibiliza monitoriza bolseiru sira. Maibe mai IX Governu, nunka tun ba Ensinu Superior sira, derepente halo mudansa bolsa hakbi’it ba fali parsiál,” Julito deklara.
Bolseiru sira mos rekunhese, uluk kedas iha kriteira ba bolseiru sira tenke iha valor bo’ot, labele kredit no iha regras barak.
“Karik maluk balun mak valor tun ka la seriu ba bolsa ne’e, FDCH bele hetan dadus iha kada Universidade, hodi foti desizaun ba sira, la’os ba bolseiru hotu,”Julito Moniz dehan.
Tuir dadus ne’ ebé FDCH fó sai iha 30 Abril 2024, benefisiairu bolsa hakbi’it iha Ensinu Superiór públiku, tantu privadu hamutuk sanulu-resin-neen (16) ho totál estudante 3.030. (*)
