Reportajen: Selestinho M. Falo/Maria Feno/ Osterlia Muni
DILI (Lifaupress) Martinho do Nasimento Obe husi Reziaun Administrativu Espsial Oe-cusse Ambenu, postu Administrativu Oesilo, suku Bobometo, aldeia Tumin la simu grupo traballista husi portu Dili ne’ebe mak hatun sasan iha Ró laran tanba ezize pasajeiru nia direitu atu hatun sasan.
“Hau lori sasan kostrusaun uma nian hanesan, besi baza, baton no ulir aluga kareta truck ida nakonu atu ba hatama iha ró Success nia laran ho kedas familia na’in 15 atu ajuda hatun, maibe derepenti grupu traballista/buruh na’in 6 mosu mai ho obrigatoriamente atu hatun sasan hirak ne’e no ha’u na’in laiha ona direitu atu hatun, Sasan nain Martinho do Nasimento Obe ba jornalista www.lifaupress.com liu husi via telefone loron Kuarta-Feira (03/07/2024).
Nia hateten, Sasan hirak ne’e sosa iha Hudilaran loja ne’e besik salaun OKA, no Akontesimentu ne’e iha loron 30 fulan Juñu tinan 2024.
“Ha’u la simu grupo traballista/ Buruh sira nia hahalok obrigatoriu ne’e tanba sira dehan ita nain ba sasan laiha direitu atu hatun sasan bainhira lori to’o ró Success nia laran traballista sira mak iha direitu atu hatun maski ita laiha kontratu ba malu ikus sira ezize atu selu tuir montante hirak mak sira hakarak husu”, nia dehan.
Nia haktuir, antes ne’e selu uluk material sira ne’e iha portaun portu Dili ba jestor fa’an ticket Success nian ho osan montante USD 100.00 tanba material barak, maibe lori sasan tama to’o ró laran hetan ameasa husi grupu traballista sira ho liafuan baku malun tanba sira dehan ami mak tenke hatun imi nia sasan tanba hetan kartaun identidade husi portu Dili.
“Ami diskuti malu tanba ha’u lakoi traballista sira atu hatun sasan sira ne’e derepentin ida dudu ha’u rabat kedas ba kareta truck, ha’u hakfodak no husu dehan tanba sa mak ita bo’ot dudu ha’u?. Sira hatan dehan ami mak iha direitu. Kualker sasan imi lori tama mai ró laran, ha’u tenta husu sira nia karta autorizasaun husi ne’ebe sira hatan ba ha’u katak ami hetan autorizasaun no ida konsegue hasai nia kartaun identidade ba ha’u maibe hau nafatin lakoin tanba nee hau nia sasan rasik hau iha direitu atu hatun tanba mai ho familia na’in 15 atu ajuda hatun sasan”, noi dehan.
Nia hateten, tuir lei katak bainhira presiza ema atu halo servisu tenke halo relasaun juridika halo kontratu ba malu entre rua ha’u ho ema ne’ebe hakarak servisu maibé grupu trabalista sira nafatin dehan ami mak iha direitu atu hatun sasan.
“Ami diskuti malu jestor ró Success nia haree hela, maibe halo finji la haree. Nune’e ha’u hakbesik ba nian husu tanba saida mak ami selu tia ona iha administrasaun, maibe gruputraballista sira mai satan ami hanesan nee”.
Jestor hatan katak, “ Imi tenke ko’alia ho sira. Tanba durante nee, sira mak servisu iha ne’e.”Maibe, hau nafatin la simu tanba hau sosa sasan, aluga kareta no selu administrasaun, atu selu tan traballista sira kbiit laiha to’o ona ba sira.
Nia hateten, ikusmai diskuti malu ho obrigatoriu nafatin ha’u dehan ba traballista sira, sei imi hakarak ajuda hatun sasan bele. Maibe, hau sei fó osan montante USD 10.00 tuir kbi’it ne’ebe iha, Sira na’in 3 rezigna-an la hatun sasan. Ami ho na’in 2 mak hatun sasan.
Nia haktuir, kazu hanesan ne’e la’os foin akontese ba ha’u maibe kuaze ba ema na’in 400 akontese ona iha portu Dili, liu-liu hau maun rasik lori nia sasan ba ró laran traballista sira la halo kontratu direita ba hatun sasan to’o hotu.
“Derepenti maun tun husi kareta sira ba husu atu fó osan tanba sira mak hatun sasan.Rona ida ne’e, sasan nain husu fali, ” Sé mak haruka imi hatun sasan. Ami diskuti malu to’o baku malu iha ró laran tanba deit la fó osan ba traballista sira”, nia salenta.
Nia haktuir, pior liu tan mak ferik no katuas sira ne’ebe koalia tetun la hatene mak hasoru problema hanesan ne’e traballista sira husu osan ho montante bo’ot mós sira tenke foti fó tanba koalia tetun la hatene.
“Pasajeiru sira hotu tantu Atoni oan, Atauru no ema sé deit mak halo viajem ba Oe-cusse no Atauru, karik hasoru problema hanesan ne’e, labele nonok. Hato’o keisa ba jestor ró, aportil, PNTL, PM. Husu ba parte relevante sira, tenke haree situasaun sira ne’e, liu-liu Aportil no PM. Tanba hahalok ne’e halo pasajeiru sira la satisfas, tanba pasajeiru mak osan mean ba movimentasaun liuhusi ró” nia husu.
Enkuantu traballista hatun sasan iha portu Dili, Cristovão Gama haktuir,problema ne’e viral iha loron Domingu, 30 Juñu 2024. “ Dehan ami obriga no haksesuk malu ho na’in ba sasan ne’ebe ami hatun iha ró Success nia laran,” nia dehan.
Tuir Cristovao, sira inventa Ami sai viral iha Facebook sira dehan ami ameasa ho obrigatoriu maibe ida ne’e lalos, momentu ida ne’e sira mak lori ema barak atu l provoka ami to’o ikus ami haksesu malu, ami la iha hodi ameasa sira no jestor ticket mak foti solusaun sira fó $10.00 ba ami mak hatun sasan”, nia dehan.
Nia hatutan, “Ami na’in hirak ne’e servisu kleur ona iha portu Dili. Hetan autorizasaun husi Aportil. Ami lalin sasan iha nee, ami uza kartaun Governu anterior nian.”
Nia mos esplika, Aportil la fó osan estandar ba orsamentu hatun sasan. Atu selu osan nominal hira, depende husi negosiasaun entre trablador sira no sasan na’in.
Entretantu menejer ró Success, Saturnino dos Reis Sequera hateten,
grupu traballista nee, gropu legal. Tanba rekoese husi Aportil, liuhusi fo kartaun ba sira atu hala’o serbisu iha ró laran.
“Traballista sira -nia problema mak karik hatun sasan, sira hanesan obriga fali pasajeirus tenke selu tuir sira – nia hakarak, Dalaruma pasajeiros mai lori ema rasik, atu hatun sasan sira. Maibe sira obriga dehan sira mak tenke hatun” Saturnino dos Reis Sequera informa.
Saturnino mos hateten, desde inisiu Ro Succes tama Portu Dili, akontese ona kazu ne’e. “ Ami – nia Padraun mós hato’o ona kestaun ne’e ba aportil, maibe seidauk halo renovasaun. Ami levanta ona kazu ne’ebe akontese iha loron 30/06/2024 ba Aportil. Tanba ami hirak ne’ebe servisu iha Ró Success, laiha direitu atu hapara traballista sira, tanba hetan legalidade husi Aportil, atu servisu iha portu Dili, hodi hatun no lalin sasan,”nia dehan.
Bá pasajeiru sira keta ta’uk, kontinua viajen nafatin ho ró Success. Tanba problema ne’e hato’o ona ba parte relevante sira hotu, atu buka solusaun. (*)
