Reportagen: Maria Feno Colo/ Osterlia Muni
Dili (Lifaupress): Ministériu Negósius Estranjeirus no Kooperasaun (MNEK) Republika Demokratika Timor-leste aprezenta no avalia rezultadu partisipasaun Timor-leste iha programa Futuru Lider ASEAN, ne’ebe vizita ona estadu membru ASEAN sira.
Programa aprezentasaun ne’e realiza iha Salaun MNEK, Praia dos Coqueiros, Fatuhada, Dili, Tersa Feira (02/07/2024)
Vise Ministra ba Asuntu ASEAN, Milena Rangel ba jornalista sira esplika, Timor-leste mos haruka foin sa’e sira partisipa programa Futuru Lider ASEAN, ne’ebe halo vizita durante loron sanulu.
Fulan Abril 2024 liuba, Sekretariu Jeral ASEAN vizita Timor-leste no lansa programa “ Futuru Lider ASEAN “. Nune’e, Governu desidi delega lider foin-sa’e potensial balun, partisipa enkontru no hala’o atividade balun iha pais membru ASEAN.
“ Sira mós foin fila hotu mai, hafoin vizita ba pais ASEAN 10. Uniku Nasaun La’ós mak la konsege organiza. Durante vizita ne’e, fasilita no hetan akompanhamentu husi EmbaixadaTimor-leste iha nasaun membru ASEAN sira,” Vise Ministra ba Asuntu ASEAN, Milena Rangel esplika.
Iha enkontru availiasaun, Tersa Feira liu ba, partisipante sira hato’o sira – nia esperiensia no avaliasaun ba sira – nia partisipasaun atividade lubuk ida iha pais membru ASEAN.
“ Ha’u fo parabenss ba sira, tanba sira susesu durante vizita nudar aprendizajen ida kona-ba ASEAN. Antes sira ba, selisionadu no preparadu iha rai laran durante fulan balun. Sira – nia performa furak tebes. Kontinua nafatin halo investimentu ba kapitál humano ida – ne’e,” Vise Ministra dehan.
Maria Abrantes, partipante programa Futuru Lider ASEAN hateten, durante programa ne’e, delegasaun fahe kona-ba situasaun komunidade ASEAN, kunhese no aprende buat barak mos husi nasaun membru ASEAN sira.
“ Ha’u hanoin iha setor importante sira liga ba kresemente ekonomiku, dezenvolvimentu humanu, turizmu no área balu, ne’ebé bele sai hanesan setor sira ne’ebé mak presiza ita atu aprende hodi aplika iha Timor-Leste, nuudar nasaun ida ne’ebe iha hela prosesu adeasaun ba ASEAN. Ita presiza adopta husi nasaun membru ASEAN sira ne’ebé mak ami halo vizita ba,” Maria Abrantes dehan. (*)
