DILI (lifaupress) : Governu Republika Demokratika Timor-leste, kontinua haruka traballador timoroan ba Australia.
Tersa-feira (19/3/3034), Governu liuhusi Sekretária Estadu ba Formasaun Profisionál no Empregu, realiza despedida ba traballadór Timor-Oan hamutuk nain 43 ho asina deklarasaun, iha Salaun Magna SEFOPE, Kaikoli-Dili.
Traballadór Timoroan nain 43 ne’e kompostu husi Traballadór tuan hamutuk na’in 31 no Traballadór foun hamutuk na’in 13.
Sermonia despedida ne’e, partisipa direta husi Sekretáriu Estadu ba Formasaun Profisionál no Empregu, Rogério Araújo Mendonça, Diretór Jerál Formasaun Profisionál no Empregu, Carlito do Rosário Cabral, Diretór Nasionál Emprego Estrajeiru, João Coreira Pereira, Xefe Departementu Re-intregasaun Alarico Guterres, hamutuk ho familia traballador sira.
Iha okaziaun ne’e, Sekretáriu Estadu ba Formasaun Profisionál no Empregu, Rogério Araújo Mendonça, husu ba Traballadór sira atu halo servisu ho diak iha kompanhia ne’ebe mak sei haknaar ba.
Husu mos atu husi fendimentu ne’ebe sira hetan kada fulan, haruka osan mai familia, no rai osan balun nuudar fini, atu bainhira fila mai Timor-Leste, bele loke negosiu ruma, hodi emprega fali Timoroan sira seluk ne’ebé la hetan oportunidade servisu iha Australia.
“Husu ba alin sira, imi ba servisu ho diak, haruka osan ne’ebé mak imi hetan mai familia, balun imi tau, to’o loron ida imi fila mai Timor-Leste, imi bele loke fali negosiu kiik ruma, bele emprega fali maluk balun ne’ebé mak la hetan oportunidade ne’ebé iha hela suku no aldeia, ” Sekretáriu Estadu ba Formasaun Profisionál no Empregu, Rogério Araújo Mendonça dehan iha nia Diskursu.
Rogério Araújo Mendonça mós husu ba Traballadór sira ne’ebé inklina an iha Arte Marsiais no arte rituais, atu rai hela atributu sira ne’e iha familia. Bainhira fila mai Timor-Leste, mak uza fila fali.
“ Imi tenki hadok an husi hemu alcohol, tanba Traballadór barak mak hetan dezastre iha Austrália kauza husi hemu alcohol to’o lanu,” Rogerio reafirma. (Media SEFOPE/*)
