Reportajen : Celcia Magno
VENILALE (Lifaupress) : Hafoin misa iha Igreja Sagrado Corasaun De Jesus Venilale, Baucau, autoridade lokal sira hamutuk ho sarani Katolika, kuaze atus ba atus marsa la’o ain ba Edifisiu Postu Administrativu Venilale hodi selebra Loron Nasional Juventude ba dala 33.
Marsa ne’ebe partisipa husi mos husi Juventude no estudante sira ne’e, hola route liuhusi dalan publiku ba Edifisiu Postu Venilale no sarani sira lori ai-funan no lilin. Entretantu familia vitima sira, lori imajen husi sira ne’ebe mate iha Masakre Santa Cruz, 12 Novembro 1991.
Loron Nasional Juventude ne’e, partisipa mos husi Veteranu sira. Entre veteran sira, marka mos prezensa Santana Bere, Antonio Guterres, Komisaun organizadora Munisipiu Baucau, Anacleto, Komandante eskuadra Polisia Venilale, Sebastiao Freitas, Administrador Postu Administrativu Venilale, Jose Freitas Boavida ho nia estrutura, konsellu suku no Juventude sira.
Iha area edifisiu Postu Administrativu Venilale, partisipante sira tau ai – funan no kontinua kedas hala’o seminar reflesaun iha Salaun no iha loraik serimonia kari ai – funan iha monumentu Heroi da Patria, kampu Infantil Venilale nia oin. (*)
