Reportajen : Celcia Magno
VENILALE (Lifaupress) : Mate Restu 12 Masakre Santa Crus, Dili, 12 Novembru 1991, Antonio Ximenes Guterres Kódigu “Azis” hamonu matawen, bainhira hala’o reflesaun ba selebrasaun loron Juventude loriku Aswain ba dala XXXIII iha edifisiu Postu Administrativu Venilale, Baucau, tanba Timor-Leste hodi ruin no fakar ran mak Timor-leste hetan ukun rasik an.
Mate restu 12 Novembru, Antonio Guterres hasai sofrementu ho matawen tanba durante loron masakre Santa Cruz nia hanesan mos organizador 12 Novembru, sai sasin ba Masakre, baku husi military Indonesia sira, to’o sofre moras todan iha fuan no kabun kidun, tanba fai ho kilat. Sofrementu ne’e foin rekopera, hafoin tinan rua nia laran.
“Ha’u tanis, tanba lakon belun barak ne’ebe ami la’o hamutuk, hodi halo demonstrasaun iha tempu ne’eba. Tuir dalan no to’o rate laran, tropas Indonesia sira dada sai ida-idak no ha’u buka la hetan to’o ohin – loron. Senti laran moras, maibe husi barani mak to’o ohin – loron, ita ukun rasik an. Ha’u husu ba juventude no estudante sira hotu, presiza hatene Timor leste nia historia no aproveita tempu, estuda maka’as, tanba futuru iha imi nia liman rasik. Husi ami – nia terus, ohin – loron buat hotu la’o ho diak,” Antonio Guterres dehan.
“Ha’u – nia maluk maijor Waru, Natalino, hamutuk ho ha’u – nia primu Ossu Wabubu, ami sei moris ne’e sente lakon ema aten-barani lubuk ida,” T Antonio Ximenes Guterres esplika ba jornalista sira, Tersa (12/11/2024) iha salaun Postu Administrativu Venilale.
Nia os rekunhese demostrasaun ne’ebe juventude sira halo iha 12 Novembru 1991, tanba orden husi Komandante Em Xefe, Kay Rala Xanana Gusmão nian.
Kordenador Konsellu Kombatentes Libertasaun Nasionál (Sigla portugés CCLN) Postu Administrativu Venilale, Domingos Santana Guterres alias “Desididu”, apela ba veteranu/a nia oan sira, inklui juventude iha territóriu timor, atu labele kontinua kria inestabilidade. Tenki esforsu, atu asesu ba edukasaun hodi kontribui ba prosesu dezenvolvimentu iha futuru.
” Hanesan Aman, ha’u husu joven sira hotu. Imi labele aproveita katak ami – nia inan aman veteranu no veterana, ne’ebé imi kontinua halo problema.,” Domingos Santana Guterres dehan tan.
Entretantu, Administradór Postu Administrativu Venilale, José Freitas Boavida hateten, Juventude tenke orguillu ba história pasadu, tanba história sai memória, atu motiva sidadaun no povu hotu inklui joven sira hotu, hateke ba future. Presiza esforsu an ho vontade no enerjia tomak, hanesan aswain sira fó ona iha tempu uluk.
” Loron Juventude Nasional, ne’ebe foti husi loron Masakre Santa Cruz rekoñesidu iha Mundu. Sidadaun hotu tenke orgullu ho nia história rasik,” APÁ Venilale, José Freitas Boavida reafirma. (*)
