DILI (lifaupress) : Diretór Diresaun Sistema Informasaun no Aplikasaun (DDSIA) Ajénsia TIC TIMOR I.P., Sr. Justo Fernandes, akompaña husi ekipa, Kuarta-feira (4/2/22026) hala’o enkontru koordenasaun ho reprezentante husi Rejiaun Administrativu Espesiál Oe-Cusse Ambeno (RAEOA) iha edifísiu TIC TIMOR, Kaikoli.
Tuir publikasaun Mídia TIC Timor, IP liuhusi Pájina ofisial plataforma dijital Facebook TIC Timor, IP, objetivu husi enkontru ne’e atu diskuti kona-ba RAEOA nia nesesidade atu husu TIC TIMOR estabelese plataforma dijitál, nune’e bele fasilita sira hala’o servisu públiku kualidade diak iha rejiaun refere.
Iha sorumutu ne’e, ekipa husi RAEOA ne’ebé lidera husi Asesor IT RAEOA, Jonai T.M. do Carmo ho ekipa.aprezenta nesidade hirak ne’ebé sira presija relasiona ho Plataforma dijitál sira hanesan, estabelesimentu email ofisiál, Dezenvolvimentu Planu Estratéjiku ba Teknolojia Informasaun (TI) no Dijitál, Reforsa ba sistema seguransa hosting, inklui nesesidade ba konetividade rede liuhusi Kabel Fiber Optik.
Hatan ba Diretór DDSIA, Justo Fernandes, halo introdusaun kona-ba papél prinsipál TIC TIMOR nian mak atu implementa no promove Governu Eletróniku iha instituisaun Estadu hotu, husi nível nasionál to’o munisípiu, inklui RAEOA.
“Ajénsia TIC TIMOR mai ho prinsipiu ida atu implementa governu eletroniku ida ne’ebé mais abansadu iha instituisaun estadu sira hahu husi nasionál to’o munisipiu nune’e bele fasilita servisu sira ho kualidade diak”.
Diretór ne’e saliente tan katak, TIC TIMOR prontu hodi fó apoiu servisu sira ne’ebé ligadu ho teknolojia tanba TIC TIMOR nia esperansa mak dezenvolve djitalizasaun iha Timor-Leste.
Bainhira remata enkontru parte TIC TIMOR no ekipa RAEOA deside sei kontinua hala’o kordenasaun ho tekníku nune’e bele implementa lalais servisu sira ne’e.
Iha enkontru ne’e ekipa TIC TIMOR kompostu husi, Diretór Diresaun Servisu Infraestruturta Rede (DSIR), Henrique Fulgêncio Guterres, Xefi Departamentu Operasional Sentru de Dadus, Francisco do R. Ximenes, Xefi Departamentu Treinamentu no Jestaun Sistema Informasaun, Norberto Soares Cristovão, Xefi Departamentu Dezenvolvimentu Implementasaun no Integrasaun Sistema, Geovannio Ferderico de Jesus Vinhas, Xefi Departamentu Jestaun Rede, Guilherme Amaral, Xefi Departamentu Seguransa Rede Operasionáll Sentru Dadus TIC TIMOR, Agapito dos Santos Barreto no Ajente Tekniku Monitorizasaun Centru Dadus, Cirilio Noel dos Santos Ote. (*)
