Reportajen : Imaculada Tefa
OE-CUSSE (lifaupress) : Atu asegura Medikamentu ba Ospitál Regiona Oecusse, Governu Rejiaun Administrativa Espesiál Oekusi Ambeno (RAEOA), asina MOU ho Institutu Nasionál Farmasia no Produtu Medikamentus (INFPMN), Sesta-feira (5/2/2026) iha Salaun enkontru Gabinete Prezidenti Autoridade, Oe-bau, Pante Makasar, RAEOA.
Iha serimonia asinatura ne’e, autoridade RAEOA reprezenta husi Prezidente Autoridade, Régio Servantes Romeia da Cruz Salu, entretantu INFPM reprezenta husi Diretora Ezekutivu, Paulina Mendonca Maia. Marka mós prezensa iha serimonia asinatura ne’e, Diretora Rejional Saúde, Merita Marques Caunan Lafo ho etrutura tomak.
Iha akordu ne’e, sita kona-ba fornesimentu medimentus, oksijéniu, reajente no konsumaveis hodi utiliza ba pasienti sira ne’ebe asesu tratamentu iha fasilidade saúde sira iha RAEOA.
Prezidente Rejiaun Administrativa Espesial Oe-Cusse Ambeno (RAEOA), Régio Servantes Romeia da Cruz Salu konsidera medikamentu sira ne’ebe sei prepara husi INFPMN ne’e importante tebes, tanba presiza halo atendimentu di’ak ba povu iha aspetu saude nian.
Maibe nia dehan tan, utilizasaun medikamentu sira0-ne’eho loloos depende ba kapasidade funsiunariu sira atu kunhese didi’ak aimoruk no esplika didiak ba pasiensia sira, kona-ba oinsa hemu aimoruk ba moras.
Entretantu, Diretora INFPMN, Paulina Mendonca Maia hateten, liuhusi MOU ne’e sei jere diakliu tan prosesu aprovizionamentu ba stok aimoruk. “ Ami hein lista aimoruk husi Diresaun Rejioanl Saúde RAEOA no Ospitál referensia RAEOA,” nia dehan.
Tuir informasaun, Orsamentu ba tinan fiskál 2016 atu sosa aimoruk hamutuk osan dolar amerikanu $ 60.000 no ba nesesidade emerjensia aloka osan hamutuk dolar amerikanu $ 10.000.
Iha sorin seluk, Diretóra Diresaun Rejionál Saúde Rejiaun Administrativa Espesiál Oekusi Ambeno (RAEOA), Merita Marques Lafo informa, aimoruk ne’ebe presiza kuaze item 300. Nune’e presiza armajen ida di’ak atu bele asegura aimoruk sira. “ Tinan ida – ne’e ita hahú kapasitasaun ba pesoal armajen sira,” Diretóra ne’e dehan. Nia mos espera INFPMN oferese aimoruk, tuir kalendariu no durante ne’e mós la iha problema.
Ba jornalista sira, Diretora ne’e mós alert aba komunidade hotu, atu tau atensaun hamoos ambiente, tanba tempu udan bele provoka susuk denge moris iha fatin-fatin. Atualmente, kazu moras denge iha RAEOA hamutuk na’in 16. (*)
