Reportajen: Selestinho Mani Falo
OE-CUSSE – (Lifaupress) Presidente Repúblika Demokrátiku Timor-leste (PR) José Ramos Horta hato’o saudasaun ba Eis Primeiru Ministru Reinu Kamboja, Samdech Hun Sen iha buku diskursu ida ba selebrasaun aniversariu loron Proklamasaun Independensia ba dala-49, tanba konvidadu-de-onra.
“Ksolok boot mak ami simu iha Timor-Leste, iha Rejiaun Administrativu Espesial Oe-cusse Ambenu (RAEOA) Eis-Primeiru Ministru Rainu Kamboja, Samdech Hun Sen, ami nia ilustre konvidadu-de-onra hanesan sasin ida ba amizade entre ita nia povu sira no legadu folin boot harii nu’udar estadista no lider rejionál”. Iha ita-boot nia lideransa, Kamboja hetan dame, estabilidade no prosperidade.
Timor-Leste no Kamboja fahe istoria ida kona-ba reziliénsia no superasaun, hodi transforma dezafiu sira iha oportunidade ba progresu. Eis-PM Reinu Kamboja enkarna lideransa vizionáriu ne’ebe iha kompromisu atu harii futuru ida ne’ebe diak liu ba jerasaun sira tuir mai.
“Ami konfere ba nai Eis PM, grande kolár orden Timor-Leste nian, distinsaun ida nee simboliza ami nia povu nia respeitu no agradesimentu ba impaktu pozitivu neebe ita boot nia lideransa lori ba Kamboja, rejiaun no mundu”.
Inspiradu husi Eis PM Reinu Kamboja nia ezemplu, ami reafirma ami nia komprimisu atu hametin lasu entre Timor-Leste no Kamboja.
“Ami determinadu atu habelar kolaborasaun iha komersiu, edukasaun saúde no dezenvolvimentu sustentavel, atu fiar katak parseria sira katak nee sei kontribui ba futuru uda neebe prósperu armoniozu liutan ba ita nia povu sira”.
Presidente Repúblika (PR) José Ramos Horta nia diskursu saudasaun ba Eis-PM Reinu Kamboja liu husi buku kiik oan ida ho nia titulu hakerek iha oin “Discurso de Sua Excelência o Presidente da República Democrática de Timor-Leste, J. Ramos-Horta, por ocasião do Aniversário da Proclamação Independencia Timor-Leste 49, RAEOA 28 de Novembro de 2024”.
Buku testu saudasaun husi PR ba Eis Primeiru Ministru Reinu Kamboja nee iha pajina 2-3 no iha testu ne’e mos ho lian Tetum, Indonesia, Portugues no Inglês. (*)
