Reportagen: Osterlia Muni
DILI- (lifaupress): Uniaun Estudante Universitariu Munisipiu Ermera konsidera politika IX Governu Konstitusinal hodi normaliza de’it kondisaun Estrada, rezulta deit sofrimentu ba trauma tuan.
“ Loloos ne’e sidadaun hotu-hotu iha munisipiu hakarak asessu estrada ho dignu ba tempu naruk, hodi transporta produtu sira, husi area rural ba kapital munisipiu no ba merkadu nasional,” Portavos Uniaun Estudante Universitariu Munisipiu Ermera, Alinha de Jesus Soares hateten liuhusi konferensia imprensa iha Jardim5 de Maio Dili, Sesta – feira (27/06/2025).
Uniaun Estudante Universitariu Munisipiu Ermera, deklara, desizaun IX Governu Konstituisonal ne’e hamihis ona esperansa maioria povu Ermera.
“ Dinamika politika ne’e fo hanoin mai ita katak nunu governu konstituisional kontra no des-ovidensia ba kompremisiu ne’ebe maka sira rasik promete ona ba povu Ermera,” Portavoz ne’e dehan.
Munisipiu Ermera kompostu husi Postu Administrativu 6 mak Atsabe, Ermera Vila, Hatulia A, Hatulia B, Letefoho no Railaco, pertense ba Estadu Republika Demokratika de Timor-Leste.
“Problema estrada la’os novidades foun iha Ermera. Kada truka malu governasaun no givernante, sempre nafatin ko’alia problema ne’e,” nia dehan
Antes ne’e, durante kampanha eleisaun, Nunu Governu Konstituisional kompremetidu atu prioritiza estrada no kafe – nia folin. Maibe, realidade tinan rua ona, promesa ne’e mamuk de’it,” portavos Uniaun Estudante Universitariu Munisipiu Ermera, Alinha de Jesus Soares dehan ba jornalista iha Jardim 5 de Maio, Dili, Sesta-feira (27/06/2025).
Antes ne’e, bainhira hasoru malu ho komunidade sira iha Nunutali, Ermera, loron 8 Fevereiru 2025, Primeiru Ministru hamutuk ho Ministru Obras Publika hamutuk no Prezidente Autoridade Munisipiu Ermera, informa prosessu tenderizasaun ba konstrusau estrada la’o ona no promete hahu konstrusaun estrada fulan Marsu 2025.
Entretatu, Prezidenti Autoridade Munisipiu Ermera, deklara presija halo estudu viabilidade kle’an ba konstrusaun Estrada iha munsipiu Ermera.
Iha sorin seluk, durante okazisaun ne’e, Ministru Obras Publiku, Samuel Marchal mós deklara, konstrusaun estrada iha munisipiu Ermera sei hein osan emprestimu hosi Banku Mundial.
” Alternativu husi lideransa sira atu hadia kondisaun estrada iha munisipiu Ermera ne’e malahuk hela no buka hamaus deit populasaun nia laran ho lia bosok,” portavoz ne’e dehan tan..
Normalizasaun estrada ne’ebe Ministeriu Obras Publika halo, nudar resposta ida ejijensia husi Administrador Postu Administrativu Letefoho. “ Klaru katak, konsekuensia husi desizaun ne’e, haterus povu ho rai rahun, hamosu tahu dodo’ok no povu terus nafatin ,” nia dehan.
Uniaun Estudante Universitariu Munisipiu Ermera hakarak husu ba Ministru Obras Publiku, labele normalizasaun de’it estrada maibe konstrui tuir kompromisiu ne’ebe promete tia ona .
“Husu ba Ministro Obras Publika Favor ida tenki konsisten iha ita-boot nia desizaun. La’os loron ida ko’alia ida, aban halo fali desizaun seluk,” Uniaun ne’e deklara tan.
Ba Prezidenti Autoridade Munisipiu, Universitariu Munisipiu Ermera husu atu hadomi povu, reprezenta povu Ermera hodi ejiji konstrusaun estrada ho kuaidade.
Karik laiha resposta seriu, Uniaun Estudante Universitariu Munisipiu Ermera sei mobiliza nafatin forssa atu ejiji nafatin povu nia nesesidade.
Entertantu, Vise Octavio Agundo Fatima konsidera, promesa Primeiru Ministru, Ministru Obras Publika no Prezidenti PAM Ermera, nudar promesa ida kualidade, tanba nudar mos komprimisiu politika ba povu Ermera iha kampanhe eleissaun Parlamentar.
“Maibe, realidade halo de’it normalizasaun liuhusi fakar rai mean ba estrada, tanba de’it razaun katak bazeia ba proposta husi Administrador Postu Administrativu Letefoho, atu fasilita transportasaun produto husi area rural mai Gleno, kapital munisipiu ho kapital Nasional,” Vise Porta voz, Octavio Agundo Fatima hateten. (*)
