NASSUTA — Moris ho Inan-aman defisiensia no tenki esforsu halo servisu atu hetan osan, hodi tulun alin sira bele eskola di’ak, la’os fasil ba Mana Juliana Maria Mendes iha Aldeia Tetsari, suku Ulmera, postu Administrativu Bazartete,Munisipiu Likisa.
Oan husi ema agrikultor ne’e, tenki hisik kosar-been, tama ailaran hasoru dezafiu buka ai-maran hodi fa’an. Atividade ne’e, nia hala’o tinan barak ona.
Bainhira www.lifaupress.com, hasoru nia iha nia fatin halibur ai maran, Kuatra (18/06/2025) liuba, Mana Juliana hatudu oin midar de’it, maske husi nia espresaun seluk hatudu sentimentu kolen no triste.
“ Desde ki’ik, bainhira eskola iha Ensinu Primária, ha’u aprende ona servisu ajuda inan-aman, liuhusi hili ai-maran,” Mana Juliana Maria Mendes hahu konta nia istoria moris.
Atividade fa’an ai-maran desde ki’ik to’o remata eskola Pre-Sekundaria. “ Bainhira atu tama ba Ensinu Sekundaria, pai ho mãe komesa hetan ona moras defisiensia. Maske nune’e, ha’u ho alin sira nafatin tenki kontenti, kontinua eskola maske hasoru kondisaun Inan-aman nune’e,” nia dehan.
Bainhira femata ona Ensinu Sekundaria, Juliana labele kontinua ba universidade,tamba kondisaun ekonomia iha familia la permiti.
“ Kondisaun obriga ha’u bolu kedas alin sira, hodi hateten, bin hau mak agora remata ona eskola. Ha’u promete ba imi, sei buka meius oinsa atu buka aí maran hodi ba fa’an iha estrada. Nune’e, bele suporta imi-nia nia estúdu,” Juliana konta nia istoria.
Kumprimisiu ne’e nia kumpri duni. Alin sira kontinua eskola, no nia hili sai vendedor ai-maran. Nia tenki luta hasoru loro manas, udan, malirin, hamlaha, hamrik no kolen, la’o kuaze kilomteru 4 husi nia hetan fatin atu hetan ai-maran, no halibur iha fatin seguru.
Hafoin rekolla ai-maran barak, nia aluga karreta hodi tula ai, ba fa’an iha estrada ninin.
Juliana fa’an ai-maran kada lolon 4 folin $ 10 sentavus. Loron ida, nia bele osan to’o $ 50 no bele mos liuhusi ne’e. “ Ha’u-nia maun mak ai-maran iha Estrada hodi fa’an. Hafoin ema hola hotu aí – maran sira, ha’u selu maun nia kolen ho osan $ 5.
Juliana osan ne’ebe nia hetan, la’os deit atu susrenta nesidade uma laran, maibe uza mos serimonia kultura entre maun -alin, uma Mané no Mané foun . Nuudar feto, nia mos tenki halo servis iha uma laran hanesan, te’in no seluk tan.
Problema saida mak ha hasoru lorloron? “ Lorloron ha’u hasoru problema anin,udan, loron manas, hamlaha no hamrok. Maibe, ha’u kontenti nafatin maske ha’u-nia nia pai ho mãe hetan hela moras defisiensia. Tanba de’it ha’u hakarak atu alin sira moris diak hotu iha futuru, ha’u tenki servisu maka’as hodi tau-matan ba sira-nia nesesidade lorloron,” Juliana hatan.
Hanesan sidadaun simples ida, Juliana husu ba Avó Ramos Horta no Avó Xanana Gusmão, favor ida tau netik matan mai ami povu kiik oan sira,ne’ebe mak halerik hela ba ami nia moris ho ai– maran, durante tinan 37 nia laran. “ Moris di’ak mai ami ne’e laiha. Ami – nia moris mak nafatin ho aí – maran de’it,” Juliana dehan.
Juliana mos husu IX Governu Konstitusional kria netik kampu traballu iha Timor – leste, atu dezempregu sira bele kompete ba opurtunidade empregu sira. (*)
