Pontu 5 Administrador Postu Passabe Hato’o Ba PA-RAEOA
Reportajen: Selestinho Mani FaloOE-CUSSE – (Lifaupress) Administrador Postu Administrativu (APA) Passabe Paulino Marques, Segunda-Feira (03/12/2024) hato’o preokuoasaun 5 ba Presidente Autoridade (PA) Rejiaun Administrativu Espesial Oe-cusse Ambenu (PA-RAEOA) ba vizita no dialogu iha Merkado Passabe, suku Abani, atu nunee PA-RAEOA tau preoridade.
Administrador Postu Administrativu (APA) Passabe Paulino Marques
Preokupasaun mak hanesan, 1. Involve Autoridade lokál ba kontrollu projetu sira iha postu administrativu hodi bele garantia nia finalidade ho kualidade.
2. projetu estrada balun iha postu Administrativu Passabe paradu hela durante tinan rua ona, tanba ne’e, sujere ba Prezidente Autoridade hodi bele involve autoridade lokál ba kontrollu projetu sira iha suku no aldeia hodi garante nia finalidade no kualidade.
3. Ami sujere ba Prezidente Autoridade RAEOA atu ba oin involve Administradór postu Administrativu sira inklui Xefe suku sira hotu iha RAEOA ba sistema kontrollu implementasaun projetu fíziku iha baze hodi nune’e bele garante finalizasaun projetu fíziku ho kualidade di’ak.
4. Funsionáriu públiku ne’ebé destaka ba iha postu administrativu sei bele karik hamahan an iha Administrasaun postu administrativu nia okos hodi bele koopera di’ak liu tan iha prosesu atendimentu públiku.
5. Tau matan ba kazerna PNTL eskudra Passabe ne’ebé to’o oras kondisaun dook ona, no la dignu ba seguransa.
Hatan ba preokupasaun ne’e eselensia Prezidente Autoridade RAEOA, Rogerio Tiago de Fatima Lobato, hatan ba preokupasaun ne’e Informa, Autoridade RAEOA sei toma atensaun ba preokupasaun Administradór Postu Administrativu nian no tuir lei organigrama RAEOA nian hanesan ne’e maibé aplikasaun ne’e seidauk la’o tuir.
” Tanba tuir organigrama RAEOA Primeiru Ministru maka boot. Prezidente Autoridade RAEOA tutela no simu pose hosi nia ho nia membru autoridade na’in neen. Ida idak nia responsabilidade to’o iha postu Administrativu sira, no Administradór postu mak kontrola Xefe suku sira no xefe aldeia, Administradór maka reprezenta estadu no guverno iha baze, entaun liga ho preokupasaun ne’e tuir lei ne’e legal los,” PA RAEOA, Rogerio dehan.
PA-RAEOA hatutan, Administradór postu mak iha kompetensia boot iha baze bainhira iha problema ruma Prezidente Autoridade sei orienta Sekretáriu Rejionál ba Administrasaun hodi kontaktu administradór postu nia kontrollu iha baze ne’e.
” Kestaun hirak ne’ebé hato’o sei toma atensaun masimu kona-ba imi nia preokupasaun, liuliu ba estrada nian, ha’u orienta hela Diretór Diresaun Rejionál Infrastura RAEOA, atu bele halo aterru lalais ba estrada Postu Passabe nian”, nia dehan.
Entretantu Prezidente Autoridade RAEOA hatutan, Autoridade RAEOA sei monta enerjia solár cell iha estrada ninin, atu nune’e komunidade sira la’o ba mai ho kalan la bele la’o iha nakukun laran, tanba Iha tinan ne’e, Autoridade RAEOA rezolve buat barak ne’ebe mak Autoridade anterior husik hela.
Enkuantu, komunidade Postu Administrativu Passabe ne’ebe kompostu hosi suku Abani no Suku Malelat, apresia tebes ho Autoridade RAEOA nia aktividade vizita suku ne’e, tanba povu presiza tebes prezensa Autoridade RAEOA sira nian Iha komunidade nia le’et. (*).
