Reportajen : Maria Feno/ Osterlia Muni
Dili (Lifaupress) : Sekretaria Estadu Komunikasaun Sosial (SEKOMS) ho apoiu husi UNICEF realiza Worshop ba jornalista sira kona-ba Mudansa Klimátika no Étika Reportazem ba Labarik no Feto.
Abertura ofisial ba formasaun ne’ebe partisipa husi Jornalista sira iha Dili no husi Radiu Komunidade (RACOM) sira iha Munisípiu, hala’o husi Diretór Jerál husi Sekretaria Estadu Komunikasaun Sosiál, Florindo da Costa iha salaun JL VILA, Dili, Tersa Feira (03-12-2024).
Marka prezensa iha abertura ne’e, Prezidenti Konsellu Imprensa, Otelio Ote, Reprezentante UNICEF iha Timor-leste, Patrizia DiGiovanni, Xefe Komunikasaun UNICEF, Diretor Nasional Dezemvolvimentu Media Lokal, Andriano Monteiro, konvidadus no jornalista sira.
Diretór Jerál Sekretaria Estadu Komunikasaun Sosiál, Florindo da Costa hateten, “Mudansa klimátika nu’udar asuntu ida ne’ebé krítiku. Nune’e, importante tebes ba midia sira atu aprende liután kona-ba konseitu ne’e no komprende oinsá dezenvolve reportajem sira ho kualidade mudansa klimátika, ne’ebe sempre afeta ba komunidade sira.
“ Ha’u enkoraja jornalista sira, atu kontinua aproveita oportunidade sira ne’e, hodi aprende no atu dezenvolve liután sira-nia koñesimentu kona-ba konseitu oioin,” Florindo da Costa dehan.
Objetivu husi Workshopne’ebe partisipa husi . Jornalista 40 maihusi estasaun rádiu komunidade, jornál, no estasaun TV iha rai laran, atu asegura jornalista sira bele fó sai ho efetivu no loloos, kona-ba asuntu sira ne’ebé afeta diretamente ba populasaun Timor, hanesan mudansa klimátika.
Entretantu, Reprezentante UNICEF, Patrizia DiGiovanni, destaka oinsá globalmente, labarik ida-idak ohin loron hetan espozisaun ba risku klimátiku no ambientál, hanesan laloran manas, siklone, poluisaun ar, inundasaun, no eskarsedade bee.
“Ema barak mak lakon vida iha eventu sira relasiona ho klima no labarik sira – nia direitu la hetan salvasaun. Tanba ne’e, workshop loron rua ida-ne’e maka oportunidade krítiku ida ba jornalista sira atu hetan komprensaun kle’an liu kona-ba siénsia mudansa klimátika nian, ninia impaktu sira ba direitu labarik sira nian no esplora maneira sira atu kria istória sira ne’ebé maka konvinsente, bazeia ba dadus kona-ba mudansa klimátika Reprezentante UNICEF hateten
Iha sorin seluk, Prezidente Konsellu Imprensa, Otelio Ote apresia UNICEF nia esforsu konsistente hodi hasa’e kapasidade mídia no jornalista sira kona-ba reportajen bz labarik no feto, hodi Eleva kunhesimentu no kapasidade profisional ba jornalista sira, bainhira hakerek notisia kona-ba labarik no feto. (*)
