Reportajen: Sandra A.
BAUCAU (lifaupress) : Komando Polisia Nasionál Timor-Leste (PNTL) Munisípiu Baucau, liuhusi Seksaun Tránzitu konsege hatama osan koima ba Kofre Estadu ho total osan dolar amerikanu $ 6.675, durante fulan Abril to’o Maiu 2024.
INFRATOR : Polícia Transit Baucau, revista no rejista infrator ba Kodegu Tranzitu, bainhiura halo operasaun iha Baucau, semana ne’e. Foto LP/Sandra
Xefe Seksaun Tránzitu Komando Polisia Munisípiu Baucau, Alfredo Maria Ruas Therik esplika, koima sira – ne’e maihusi ema ne’ebe la iha karta kondusaun, inspesaun mate no kontra regras sinais tránzitu.
Alende ne’e, kareta viatura sira ne’ebe kontinua reben metan, Komandu Polisia Baucau, Seksaun Tranzitu sei aplika multa.
VIDRU METAN: Polícia Transit Baucau, para revista ba Transporte Publiku ne’ebe vidru uza reben metan liu estandarte ne’ebe regula iha Kodegu Estrada. Foto LP/Sandra
“Polisia tranzitu nafatin halo vigilansia sweeping. Kareta sira ne’ebe mak uza reben metan makas liu, tenke hapara, haruka kondutór rasik mak les no aplika koima, tuir kodigu Estrada, ho osan kuaze dolar amerikanu $ 50 no maximu $ 70, “ Alfredo Maria Ruas Therik hateten .
Nia husu ba motorista sira atu kumpri nafatin Lei Kodigu Estrada, hodi evita asidente.
” H’au hameno ba motorista motor no kareta, favor halo parajen iha estrada ninin, atu la prejudika fali ema sira la’o ain ba-mai. Kumpri nafatin Lei no Regra sira. Sei Karta Kondusaun la iha, tenke trata,” Xefe Seksaun Tránzitu dehan tan.
Durante semana ida, Komando PNTL Munisipiu Baucau, liuhusi Seksaun Tránzitu, prende transporte públiku microlete no bus hamutuk 57 no fo sansaun multa/ tamba kontra Lei Kodigu Estrada. (*)
