Reportajen: Selestinho Mani Falo
DILI (Lifaupress) Alfredo Carvalho, eleitu atu lidera Assosiasaun Akadémika Estudantil (AAE) Fakuldade Edukasaun Arte Humanidade (FEAH), Universidade Nasional Timor Lorosa’e (UNTL) tinan 2024-2026, hafoin hetan 742 iha eleisaun estrtutura organizasaun, Sesta (24/5/2024) iha Dili.
ELEITU : Alfredo Carvalho, ne’ebe eleito Sesta-feira (24/5/2024) hodih lidera AAE FEAH), Universidade Nasional Timor Lorosa’e (UNTL) periodu 2024-2026. Foto DOK/Alfredo
Iha eleisaun ne’ebe partisipa husi votante 2.214, Alfredo Carvalho tama iha pakote B. Nia pakote konsege halibur votus 742 ka barak liu, kompara ho Pakote A hetan votantes 726 no pakote C hetan votus 659. Iha votasaun ne’e mos votus nulu 87 no reklamasaun mamuk.
“Ha’u agradese ba votantes sira hotu, tantu husi finalista, alumni no estudante ativu, ne’ebe fó ona fiar mai ha’u ho estrutura pakote “B” atu lidera AAE ba FEAH ba periudu 2024 to’o 2026,” nia dehan Sala AAE, FEAH, Liceu UNTL, Dili, Sexta (31/05/2024).
Alfredo Carvalho ho nia ekipa uza moto “ Ami mai tanba imi, imi hain tanba ami. Ita hotu halo asaun kontribuisaun ba FEAH.”
Alfredo mos reafirma, planu hirak ne’ebe hato’o durante kampaña kandidatura, ne’e parte husi demokrásia. La signifika la hala’o, maibe ita tenke koopera hamutuk no tau konkordansia ida, mak bele atinji progresu tuir programa sira.
“Ami sidadauk simu pose no simu knar husi estrutura sesante sira. Maibe husu estudante sira hotu iha FEAH, ne’ebe hasoru problema no difikukdade, hakat mai iha Sala 13 AAE hodi resolve hamutuk”, nia afirma.
Estrutura foun, husi Assosiasaun Akadémika Estudantil (AAE) Fakuldade Edukasaun Arte Humanidade (FEAH), Universidade Nasional Timor Lorosa’e (UNTL) tinan 2024-2026, sei simu pose ofisilamente fulan Juñu 2024, hafoin FEAH Games remata. (*)
