Reportajen : Celcia Magno
VENILALE (lifaupress) : Programa Nasional Dezenvolvimentu Suku (PNDS) konstrui armajen agrikola ho medida 16 x 8 m² iha Suku Uai oli Postu Administrativu Venilale Munisipiu Baucau,
Konsrusaun armajen ho total orsamentu rihun $ 41.000 ne’e, atu halibur produtu lokal husi komunidade sira, hodi halo promosaun ba aihan lokal sira.
Abertura ofisial ba Armajen Uma Agrikula ne’e, hala’o husi Xefe Suku Uai-Oli, Doadvend Da Cruz Ximenes, Kuarta-feira (24/4/2024). Nune trabalhador sira hahu konstrusaun iha loron Kinta Feira (25/04/2024).
Atu prosesu konstrusaun la’o di’ak, Konsellu Suku Uai Oli realza enkontru ho trabalhador ho sira no asina kontratu servisu konstrusaun ho osan $ 3.700 dolares.
Koordenador PNDS Postu Administrativu Venilale, Adelino Da Silva iha enkontru ho Autoridade suku no trabalhador sira hateten, PNDS fasilita ba programa sira hotu ,ba Konsello Suku, hodi realiza konstrusaun armajen. Nune bele finaliza iha tempu badak, atu komunidade sira kontenti lori produtu lokal hatama iha armajen.
Entretantu Xefe Suku, Doadvend Da Cruz Ximenes reafirma, Armajen ne’e atu halibur Produtu local. “ Komunidade sira sei interese tebes, hodi habelar aihan lokal, ne’ebe sira hatene ba esperensia ba buat ne’ebe sira hatene,” nia hateten.
Iha parte seluk, Nicolau Freitas Belo, nudar Badaen, aseita hodi halo konstrusaun Armajen Uma Agrikula. “ Ami sei servisu haka’as aan, hodi remata kontrusaun iha tempu badak, tanba material konstrusaun preparadu ona,” Nicolau Freitas Belo hateten. (*)
