Reportajen : Celcia Magno
VENILALE (lifaupress) : Reprezentante Prezidenti Autoridade Munisipiu (PAM) Baucau, liuhusi atual Sekretaria munisipal Asunto Sosial no Organizasaun, Maria Celestina Viegas, lansa Programa Merenda Eskolar (PME) atu reforsa saude, haburas nutrisaun ba estudante sira, hodi partisipa prosesu aprendizajen ho saude di’ak.
Lansamentu Programa Merenda Eskolar ne’e, hala’o iha Eskola Ensinu Baziku Central 3 Ciclo Uai-Bua, Postu Administrativu Venilale, Munisipiu Baucau, Segunda Feira (6/5/2024) tuku 10 dader OTL.
Tinan ne’e, PAM Baucau halo abertura ba programa merenda eskolar iha Eskola 3, kompostu husi EBC 3 Ciclo Vila Nova Baucau, EBC 3 Ciclo Uai-Bua Venilale, no EBC 3 Ciclo Aubaca .
Molok lansamentu, auoridade eskola ne’e, tara uluk Tais ba reprezentante PAM, Maria Terezinha Viegas, Reprezentante Diretor Edukasaun municipal, Adolfo de Jesus Freitas. No parezenta mos dansa kultura Tebedai ,no liafuan Benvindo husi Estudante sira.
Tuir Lei 61/ 2022 iha Loron 24 Agostu atribui ba Edukasaun programa Merenda Eskolar iha teritoriu laran tomak, atu estudante sira bele hetan nutrisaun diak.
Reprezentante Autoridade munisipiu Baucau, Maria Terezinha Viegas iha nia diskursu hateten, programa merenda eskolar tau importansia ba nutrisaun l di’ak, la’o tuir regulamentu menu ne’ebe regula kona – ba utilizasaun aihan lokal sira husi postu Administrativu Venilale rasik.
“ Agora presiza aihan lokal husi komunidade sira ne’ebe produz aihan hanesan aifuan no modo sira. Nune’e osan bele fo hela ba sira, hodi sustenta fali ba moris loron loron,” nia dehan.
Nia mos rekunhese, programa merenda eskolar tinan ne’e atraza tebes, tanba impaktu husi relatoriu tinan 2023.
Entretantu Reprezentante Diretor Edukasaun municipal, Adolfo de Jesus Freitas husu ba professor sira, atu implementa orsamentu ho di’ak no tuir menu ne’ebe iha, hodi haburas nutrisaun di’ak ba estudante sira, bele tuir prosesu aprendizajen ho di’ak.
“ Orsamentu ne’ebe la implementa ba programa merenda escolar, entrega fali ba BNCTL no osan ne’ebe iha ona, presiza jere ho di’ak ba estudante sira, ” Gabinete Apoiu tekniku Edukasaun, Afonso esplika.
Diretor Ensino Bazico Central Uai-Bua Venilale, Domingos Ximenes hateten, asesu ba programa merenda eskolar ne’e diak tebes ba estudante sira. “ Estudante sira bele asesu ba prosesu aprendizajen ho di’ak no saude di’ak,” nia dehan.
Aliende ne’e, membru ekipa jestaun programa merenda escolar, Cornelio Guterres husu ba Autoridade munisipiu Baucau, atu PME implementa sedu uituan, atu iha futuru labele fo impaktu ba estudante sira hamlaha iha eskola. (*)
