Reportajen : Sandra B.
BAUCAU VILA (lifaupress) : Hafoin paradu tempu naruk, estudante sira iha Timor-leste, inklui iha munsipiu Baucau, hahu simu fali aihan merenda escolar, tinan ne’e.
ENTREGA MERENDA : Prezidenti Autóridade Munisípiu Baucau, Veneranda Eurico Marques Lemos Martins entrega aihan merenda Eskolar ba estudante sira durante lansamentu programa ne’e, Segunda-feira (6/5/2024) iha ha Eskola Ensino Basico Central 03 Vila Nova, Baucau. Foto LP/Sandra
Iha Postu Administrativu Baucau Vila, munisipiu Baucau, lansamentu aihan merenda eskolar tinan 2024 ne’e, ofisializa direta husi Prezidenti Autóridade Munisípiu Baucau, Veneranda Eurico Marques Lemos Martins, akomapnha husi Diretór Servisu Munisipál Edukasaun Baucau, Afonso dos Santos Freitas.
Lansamentu ne’e hala’o iha Eskola Ensino Basico Central 03 Vila Nova, Baucau.Enkuantu total orsamentu ba preparasaun aihan merenda eskolar iha Munisípiu Baucau hamutuk milião rua resin.
Totál benifísiariu programa Merenda eskolar iha Munisípiu Baucau hamutuk estudante 32,227 husi eskola atusrua sianulu resin haat, kompostu pre-eskolár haatnulu resin ida no ensiñu báziku atusrua limanulu resin tolu .
Prezidenti Autóridade Munisípiu Baucau, Veneranda Eurico Marques Lemos Martins hateten, menu iahan ba merenda escolar, kuaze maioria maihusi produtu lokal, hodi garante ba kualidade nutrisaun.
Diretór Servisu Munisipál Edukasaun Baucau, Afonso dos Santos Freitas, husu estudante sira, ativu nafatin iha prosesu apredizajen tamba governo prepara ona merenda escolar.
Estudante Eskola Báziku Sentrál 03 Vila Nova Baucau, Celestina Freitas senti kontenti tamba governo reativa fali ona programa merenda escolar. (*)
MERENDA : Estudante sira han aihan meranda ekolar, hafoin lansamentu programa nee ba tinan 2024 iha Eskola Ensino Basico Central 03 Vila Nova, Baucau. Foto LP/Sandra
