Reportajen Celcia Magno
VENILALE (lifaupress) : Desde fulan Janeiru to’o Abril 2024, numeru kazu violensia domestika aas liu ho kazu 16, husi total kazu 32 ne’ebe rejistadu iha Eskuadra Polisia Venilale, munisipiu Baucau.
Komandante Polisia Eskuadra Polisia Venilale, Sebastiao Freitas iha entrevista ho jornalista online www.lifaupress.com iha edifisiu Esquadra Policia Venilale, Segunda Feira (22/04/2024) tuku 09.00 esplika, husi kazu sira ne’e, kazu ameasa 3 ,kazu ofisiais 3 no kazu abstensaun 10.
“ Polisia Eskuadra Venilale rekolla ona dadus no sei prosesu tuir lei, inklui koopera ho ONG Pradet atu atende kazu ne’e, molok hodi lori ba Tribunal,” nia dehan.
Kona-ba servisu polisiamentu iha komunidade nia leet, nia dehan durante ne’e la’o di’ak. Tanba iha koperasaun di’ak ho populasaun no autoridade lokal sira.
“Seguransa fila ba Ema idakidak nia konsensia no kolaborasaun, bazeia ba Lei artigu 30/ 1 dehan “Halo seguransa ba ita-nia aan rasik,” Komandande Eskuadra Polisia Venilale esplika tan.
Komandante Policia Esquadra Venilale, Sebastiao Freitas husu ba komunidade sira, atu hakbesik ba Polisia, bainhira hasoru kazu saida de’it.
Entretantu, Quintao Varela nuudar estudante, hateten, ema hotu presiza iha konsiensia atu labele halo problema iha fatin publiku, tanba seguransa iha ita-nia liman rasik, la’os husi polisia Sira.
“ Kolega joven sira presiza hamenus problema iha ita – nia rai. Preciza iha hanoin de’it ba eskola no ba komunidade sira idaidak nia servisu,” Quintao hateten. (*)
