Reportajen : Celcia Magno
VENILALE (lifaupress) : Truk Feto Mesak ho sapa matrikula 59480, baku fila no mota lori kusze metru 30, bainhira mota boot iha mota Buihulu, Uai-Oli, Venilale, Baucau (27/04/2024), tanba udan boot tun kuaze haat, hahu husi tuku 12.00 to’o tuku 6 loraik Sabadu (27/4/2024).
Truk Feto Mesak, tama mota Buihulu, Uai-Oli, Venilale, tula hela Britas husi Ariana, Venilale ba suku Uai oli, Postu Administrativu Venilale, tuku 4 loraik. Iha mota laran, Truk ne’e susar atu hakat mota tanba mota boot tebes.
Tuir kronolojia, truk Feto Mesak rua tula Britas husi Ariana, Venilale, ba Suku Uai-Oli. Truk ida sapa matrikula 52729, to’o dalan klaran iha area Uai oli, kareta halis tanba tahu barak. Nune, truk ida seluk ho sapa matrikula 59480 mak ba ajuda tula Britas.
Nune iha tuku 4 loraik, truk ho sapa matrikula 59480 ne’ebe atu fila ba Venilale, to’o iha mota Buihulu Uai-Oli hare bee komesa merak. Kondutor ho naran Joselino do Rego, senti ta’uk ona. Nune’e, nia husu ba ba estudante na’in 2 ne’ebe hakat hela mota, kona-ba mota-nia kondisaun. Estudante sira hatan, “Mota badak Hela”.
Nune’ e kondutor Joselino koko tama mota no harea bee sae maka’as ho velosidade maka’as. Nune’e, kondutor halo esforsu to’o konsege hakat ba mota sorin. Maibe, kuitadu! Roda rua husi kotuk belit iha ratuk no mout iha rai – henek mota laran.
Maske luta atu bele hasai roda husi batuk satan hela no raihenek taka, maibe la iha susesu. Kareta mate fatin no bee-mota tun boot ba bebeik. Konsekuensia mak kareta baku fila no mota lori kareta kuaze metro 30. Antes mota lori kareta, Joselino haruka tia ajudante no pasajeiru ida, sai husi karet.
Hare situasaun la seguru iha mota laran, kontaktu kedas na’in ba kareta, mai direta iha fatin akontesementu. Prosesu salva kareta mos hahu.
Nain ba Truk Feto Mesak ba jornalista www.lifaupress.com, Domingu (28/04/2024} dader kuaze tuku 11.00 via telefone esplika, atu bele dada sai kareta, ba dahuluk uza Truk ida hodi dada sai kareta husi mota laran. Maibe la susesu.
Ikus mai, husu fali tulun ba kareta Eska, husi kompanhia Putra Baucau mak dada sai kareta, hafoin esforsu maka’as husi tuku 07.00 to’o 09.00 kalan.
“ Kondutor ho nia ajudante no pasajeiru ida, ho kondisaun di’ak hela, tanba salva aan antes kareta baku fila iha mota laran,” na’in ba kareta Truk ne’e esplika.
Entretantu Komandante Polisia Esquadra Venilale, Sebastiao Freitas hateten, atu la hetan asidenti no sai vitima iha mota laran, bainhira udan no mota boot, presiza kontrola aan. “ Ne’ e akontesimentu ida husi natureza. Bianhira udan no mota boot, labele obriga aan atu tamano hakat mota,” nia dehan.
Komandante Polisia ne’e mos husu ba pasajeiru no kondutor sira, atu labele halo movimetu iha tempu udan, liuhusi mota Buihulu. Tanba risku boot ba ema – nia vida, siguransa iha ema idaidak-nia liman rasik.
Alinde ne’e, Xefe Suku Uai-Oli, Doadvend Da Cruz Xemenes hateten, populasaun, inklui estudante sira-nia movimentu husi Uai oli ba Venilale la para, tanba lori produtu lokal ba merkadu no ba eskola.
Doadvend husu ba Governu, liuhusi Ministeriu Obrak Publiku atu normaliza urjente ba dalan liuhusi ponte ne’e atu iha futuru labele hamate agriklutor no estudante sira-nia movimentu, liuliuiha tempu udan.
Suku Uai oli, iha aldeia 4 kompostu husi Uai-ae, Uatu-Misa,aca-uata, Lulibau no Aldeia Osogori. Husi Husi Venilale ba Uai-Oli kuaze kilometru sia. (*)
(*)
