Reportajen : Celcia Magno
SERVISU hamutuk iha grupu ida, atu ajuda hakman servisu entre agrikultor sira, atualmente sai trend ida iha Venilale, Baucau, tempu kuda hare. Total membru ha grupu ne’e la’os ki’ik.
No total natar ne’ebe grupu susesu kuda, mos la’os uitoan. Natar 25 mak sira konsege kuda tia ona. Kada natar ho luan entre hectare 1 to’o 5.
Sesta-feira (26/4/2024) ne’e, jornalista www.lifaupress.com, Celcia Magno vizita grupu agrikultor ne’e ho hanaran Grupu Loime La’o Hamutuk iha Natar Lia-kira ,suku Uai-Oli, Postu Administrativu Venilale Munisipiu Baucau.
Lucia Ximenes, membru Grupu Loime Lao hamutuk esplika, Grupu ne’e estabelese kuaze fulan rua resin ona ho nia membru na’in 40 resin, komposu huisi labarik, foin-sa’e no adulto.
” Ami la’o hamutuk ne’e, atu ajuda ka tulun malu, kuda hare lalais iha natar. Nune’e, ami bele halo fali servisu iha to’os, hodi kuda modo.
Kada loron, kuaze tuku 08.00 dader, sira sai husi uma ba natar. Husi uma ba natar kuaze oras ida. Tuku 09.00 hahu tama natar. Servisu dahuluk mak fokit hareoan, no lalin ba natar laran hodi kuda. Natar na’in lidera servisu, prepara hareoan.
Kada natar, bele kuda durante loron ida to’o tolu, depende natar nia laun. Natar na’in prepara aihan almosu entre tuku 12,00 meiudia to’o tuku 01.00. Hafoin almosu, uza tempu balun hodi deskansa, mak kontinua kuda to’o tuku 05.00 loraik.
Tanba halibur ema barak, ambiente iha natar animadu tebes. Hamnasa no hirus malu – kahur malu. Dalaruma, sira espresa sentmentu kontenti liuhusi kose tahu ba malu, hatudu mos amijade, fiar malu, nune’e anima situasaun hodi kuda hare hotu lalais.
Entretantu, Amijo Varela hateten, grupu kontinua esforsu tan atu durante fulan ida nia laran, finaliza kuda natar sira ne’ebe seidauk kuda. Hela deit natar 7 mak seiduak kuda, tanba hare bibit seidauk to’o tempu atu fukit no kuda.
Iha Aldeia ne’e, maioria populasaun moris ho vida Agrikultor, hanesan halo to’os, aatar, kuda aifuan Jambua, Aiata, Derok, Nuu no selun Tan. (*)
