Reportajen : Ekipa Rakom Manufahi
MANFAHI (lifaupress) : Profesor Kontratadu Ingresu no Rejime Kareira Dosente na’in 312, Tersa Feira ((4/06/24) asina Termo Aseitasaun no Posse husi Ministra da Edukasaun (ME ) no Presidente Komisaun Funsaun Publika(KFP) Iha Salaun Paroquia Nossa Senhora Asunsaun, Same,Manufahi.
Prezidenti Komisaun Funsaun Publika, Agustinho Letensiu de Deus hateten,emposadu sira simu pose atu tane aas etika profisionalizmu hodi hala’o knaar nuudar manorin na’in. “ Imi – nia papel importante maka hanorin alunu sira, atu iha etika kualidade, dixiplina no iha mentalidade. Ida – ne’e maka sai fator impostante ba dezenvolvimentu kapasidade alunu sira,” Prezidenti Komisaun Funsaun Publika, Agustinho Letensiu de Deus hateten .
Agustinho Letensiu de Deus husu mos ba manorin sira, atu hatudu lealdade,obedese no prontu atu servi. “ Papel importante tebes ne’ebe edukasaun tau ba ita boot sira. maka atu eduka alunu sira ho kualidade iha futuru,” nia dehan tan.
Ministra Edukasaun, Dulce De Jesus Soares hateten, durante vizita eskola balun,manorin sira servisu la pontual no abandona alunu sira, hanorin alunu sira la tuir kurikullu no ambiente eskola fo’er
“ Ida nee fo impaktu ba aprendizajen estudante sira. Ha’u enkoraja nafatin manorin sira, atu kuda metin etika no dixiplina no sai ezemplar ba alunu sira,” Ministra Dulce de Jesus Soares hateten.
Alende ne’e, Ministra husu ba Prezidente Autoridade no Dirijente sira iha Manufahi, atu ajuda Ministeriu Edukasaun hakat ba eskola sira, ko’alia ho manorin no kanorin sira, hadia Kualidade Edukasaun iha Manufahi.
Iha fatin hanesan, Prezidente Autoridade Munisipiu Manufahi, Luis Marcal da Costa Tavares hateten, papel profesore sira importante tebes atu atinji kualidade edukasaun no dezenvolvimentu iha munisipiu Manugahi.
“ Ha’u husu ba manorin sira, atu pasensia, haraik aan, badinas, pontualidade iha knaar lorloron no hatudu nafatin onestidade, la’o tuir regra, obedese ba superior sira, tau interese estadu, aasliu duke intrese privadu,” PA Manufahli, Luis Marcal da Costa Tavares husu ho seriu.
Nia mos husu nafatin ba manorin nain sira, atu buka aprende nafatin no hatene informasaun no siensia sira, hodi aumenta abilidade respeita, no simu malu iha kualquer pozisaun. (*)
