MANUFAHI (lifaupress) : Movimentu Kamponese Timor-Leste (Mokatil) vizita Eskola Bazika Filial Caicasa, suku Caikasa, Postu Administrativu Fatuberliú, Munisipiu Manufahi, hodi hare direita produtu fos ho manu – tolun aat, ne’ebe viral iha Media Sosial Facebook .
KONVERSA —Prezidenti Mokatil, Elio Dias da Silva converse hela ho fornesedor Aihan merende eskolar, odi hatene kona-ba Kondisaun produtu ne’ebe Mokatil fornese. Foto/Inha.
Tuir Fornesedor EB Filial Caicasa, Vitoria Amaral, tinan ida- ne’e akontese dala rua. Primeiru akontese ba manu tolun, kuaze manu tolun sira ne’ebe oferese husi kompania aat hotu. Segundu, fos ne’ebe oferese husi Mokatil aat no ular.
“ Maibe ida – ne’e ami hato’o kedas ba equipa jestaun merenda escolar, hodi troka fali ho fos diak. Fos ne’ebe fornese husi Mokatil, liuhusi ekipa jestaun merenda escolar, lori ba escola EBF Caicasa iha tempu uda.,” ” Victoria Amaral esplika.
Alende ne’e, bainhira lori fos mai eskola, alunu sira sei ferias hela. Ami tau hela iha dapur semana ida. Liutiha semana ida, alunu sira komesa tama eskola. Ami mos te’in liutia loron haat, mak ami foin hetan foos aat.
Diretor Eskola Klakuk, Antonio Belsior Sarmento hatetetn, ida- ne’e hanesan previleju boot tebes mai eskola. “Durante ne’e, ami liuliu merenda eskolar, ita hotu hatene katak merenda eskolar ne’e, nia benifisiu liuliu ba aumenta nutrisaun,” nia dehan.
“Ita hare kazu ida agora la kondis ho ita-nia hakarak. Akontesimentu ne’ebe viral Iha media social, sai mata dalan ida. Husu ba Governu, atu tau atensaun no kontrola fornesedor aihan merenda escolar. Husu tebtebes ba Governo, atu tau atensaun no kontrola Mokatil. Nune’e fo vantejen nutrisaun di’ak ba ita – nia oan sira ne’ebe konsumu,” Antonio Belsior Sarmento hateten.
Hatan ba preokupasaun ne’e, Prezidenti Mokatil, Elio Dias da Silva hateten, Movimentu Kamponese Timor-Leste husu deskulpa barak tebes, relasiona ho problema aihan merenda eskolar.
Mokatil nuudar organizasaun kamponeses, ne’ebe foti responsabilidade ba produto hotu, liliu ba karbohidrat, vitamina ba oan sira.
Mokatil fornese ona aihan merenda eskolar, kuaze fulan ida ona, bazeia ba akordu ho Ekipa jestaun merenda eskolar ho Governu local, katak, Mokatil maka sei distribui produtu sira ne’e.
Mokatil sei konsentra produtu sira ne’e, iha armajen Edifisiu Edukasaun Munisipiu Manufahi, depois mak distribui ba eskola sentral sira.
Husi Eskola Sentral, mak ekipa jestaun merenda eskolar distribui fali ba eskola Filial sira. “ Ida – ne’e responsabilidade husi ekipa jestor merenda eskola sentral sira. Tanba ita hatene, servisu boot. Entaun, sempre iha falansu sira, tanba klima agora ne’e prejudika prosesu distribuisaun produtu aihan sira ba eskola sira,” nia dehan tan.
Nia rekunhese rona informasaun kona-ba fos saku ida aat. Mokatil prontu nafati atu fornese produtu aihan ba merenda escolar, tuir manual merenda escolar.
“ Ami garante 100℅ ! Kuando la to’o, ita – boot sira bele superviziona ami – nia servisu. Ami prontu responsabiliza produtu sira – ne’e, tanba balun produz rasik husi membru Mokatil iha Manufahi, hanesan koto, tahu, tempe no manu bluer. Membru husi Likisa mak fornese manutolun husi Railaku, “ nia dehan tan.
Prezidenti Mokatil informa, fos ne’ebe fornese ba eskola sira, mak fos husi fos rai neebe seidauk kolleta no balu dulas ona. Atualmente, sotk iha armajen Mokatil kuaze tonelada 80.
Fos ne’ebe estudante sira consume dadaun ne’e, mai husi Movimentu India ne’ebe hetan sertifikasaun husi Organizasaun Saude Mundial Alimentar. Atualmente, Mokatil iha membru 137,630. (*)
