Reportajen : Celcia Magno
VENILALE (lifaupress): Prosesu aprendizajen la’o nafatin iha Eskola Ensino Baziku filial 3° Ciclo Uatu-Misa Uai-Oli, Venilale, Baucau, maske menus professor.
Durante tinan ne’e, Professor iha Eskola EBF 3° Ciclo Uatu-Misa hamutuk na’in 9, kompostu Profesor nain 1, funsionariu pertamanente,na’in 3, lisensiadu na’in 2, no na’in 3 seluk Grau Akademiku sekundariu
Ba Ezame primeiru periudu la’o di’ak, tanba Profesor na’in 8 nafatin kontribui hanorin estudante sira, maske Ministeriu Edukasaun hapara kontratu iha tinan kotuk.
Tama Ba Faze Segundu periudu, Profesor na’in 8 ne’e, balun kontinua ho inisiativa hanorin materia ba estudante sira, maske la pasa iha Teste Bolsu meritu semana hirakliuba.
ENTREVISTA: Jornalista Lifaupress.com, Celcia Magno (liman loos) entrevista hela Inspetor Eskolar Postu Administrativu Venilale, Bernabe Sarmento.
Inspetor Eskolar Postu Administrativu Venilale, Bernabe Sarmento iha sorumutu ho koordenador Eskola EBF Uatu-Misa, Rogerio Estanislao Sarmento hateten, lei la taka dalan ba Profesor auxiliar sira, atu hanorin materia ba estudante sira iha eskola hotu.
Alemde ne’e, iha mos Profesor funsionariu na’in 3 ne’ebe ho idade avansadu husi idade 60,63 no 82 sei hanorin estudante sira iha 1 no 2 Ciclo.
Bernabe Sarmento promote, tempu badak sei koloka profesor husi Eskola EBF 1 no 2 Ciclo seluk, atu hanorin estudante sira, antes tama ba faze segundu periudu.
Iha Parte Seluk, Koordenador Eskola EBF Uatu-Misa, Rogerio Estanislao Sarmento aseita ho Inspetor Eskolar Postu Administrativu Venilale atu tempu badak rezolve ba problema falta professores ba 3°ciclo sira.
Entretantu Professor provizoriu ne’ebe responsabiliza hanorin 3°Ciclo, Carlos Sarmento ba Jornalista online www.lifaupress.com hateten, “Ami sei servisu hamutuk atu koloka profesor balun mai hanorin estudante sira, tuir materia idaidak. Nune’e labele abandona estudante sira iha fazeSegundu periudu.
“Ba professores ne’ebe Governu hapara ona kontratu, tuir fila ba idaidak nia konsensia atu kontribui hanorin. Ami la obriga, maibe eskola kontinua hala’o prosesu aprendizajen,” nia dehan.
Professor Basarelatu, Rui Oscar Ximenes
Professor Basarelatu, Rui Oscar Ximenes nafatin kontribui hanorin estudante sira, maske kontratu remata ona tinan kotuk. “ Tanba ha’u hakarak atu oan sira susesu iha futuru, labele abandona sira iha prosesu aprendizajen,” Rui Oscar Ximenes dehan.
Eskola ne’e kondisaun edifisiu sala de aula komesa aat, hanesan plafon, odamatan, kadeira no seluk tan. Eskola EBF 3°Ciclo Uatu-Misa iha estudante hamutuk 121. Husi numeru ne’e, feto barakliu ho total estudante 62, entretantu mane iha na’in 59. (*)
