Reportagem: Everalda da C. D. Maia
DÍLI (lifaupress):Autoridade protesaun sivil (APC) Timor-leste, Komemora aniversáriu Bombeiros ba dala XXIV, Kinta-feira (25/4/2024) iha resintu edifisiu Bombeiro, Dili.
Komerasaun tinan ne’e hili tema “Bombeiros teknikamente preparadu dixiplina, seriedade ba dedikasaun profesionalizmu no uza mekanismu adekuadu hodi halo atendimentu ba sidadaun tomak iha Timor-Leste.”
Vise Primeiro Ministru/Ministru Koordenador Asuntu Sosiais no Ministru Desenvolvimentu Rural no abitasaun komunitaria, Mariano Assanami Sabino iha serimonia aniversariu ne’e, husu ba Bombeiros hotu atu kumpri dever, repatria liafuan, uza liafuan principal iha misaun importante, atu salva ema no salva sira ne’ebe iha situasaun difísil.
” Bombeiros hambrik iha tinan naruk no maduru ona. Tanba ne’e, Governu kontinua tau- matan no reforsa instituisaun ne’e, ” Vise Primeiro Ministru, Ministru Koordenador Asuntus Sosiais no Ministru Desenvolvimentu Rural no Abitasaun Komunitaria, Mariano Assanami Sabino, ko’alia ida ne’e ba Jornalista .
Governu rekunhese ho idade 24, Bombeiros metin no hatudu ona profisionalizmu iha atendimentu publiku, relasiona ho protesaun ba sidadaun sira ne’ebe hetan dezastre iha tasi no rai-maran “ Husu nafatin Ministru Interior ho SekretáriuEstadu Protesaun Sivil, atu nafatin fo apoiu reforsa institusional,” Mariano Sabina dehan.
” Sei akontese dezastre iha tasi laran, rai maran liuliu mosu inundasaun tanba mudansa klimatika, Bombeiros tenki pronto servu, hodi fo protesaun no atendimentu ba vitima sira, “ nia reafirma
Governu Timor-leste agradese ba Governu Portugal, Nova Zelândia, Indonésia no nasaun seluk ne’ebe apoiu ona Eleva kapasidade institusaun Bombeiros nian, hodi servi povu no nasaun.
Aleinde ne’e, Sekretáriu Estadu Protesaun Sivil, Domingos Mariano Reis hateten, Bombeiros Timor-Leste estabelese iha tinan 2000, atu servi no proteje povu husi ameasa dezastre terrestre, aero no marítima.
“Bombeiros tenki mantein profisionalizmu no prontu oras 24, hodi responde povu-nia nesessidade no kauza dezastre no katastrofes iha Timor-Leste,” nia dehan tan. (*)
