Reportajen Celcia Magno
VENILALE (lifaupress) : Maske hasoru dezafius difikuldade oioin, udan, anin no la’o dok, estudante sira husi Universidade da Paz (UNPAZ), la namate sira – nia espiritu no vontade kontinua hala’o estajiu, hodi halo sosializasaun ba komunidade sira iha suku ho aldeia .
Estudante estajiariu feto no mane hamutuk 44, mak hala’o estajiu iha Postu Administrativu Venilale, Baucau, hodi tun direta ba baze halo sosializasaun ba komunidade kada suku ho aldeia, kona ba problema sosial ne’ebe kada uma kain hasoru iha moris loron-loron.
Estajiariu sira ne’e, halao sira – nia estajiu tuir fakuldade no departamentu, durante fulan tolu, hahu Abril to’o Julho 2025.
Entretantu, Grinos Martinho Varela, estudante estajiariu husi Departamentu Administrasaun Publika, Fakuldade Siensia Sosiais Humaniora, ba jornalista online lifaupres, liuhusi watshap informa, “difikuldade ne’ebe ami hasoru iha ami – nia terenu mak udan, no lao dook durante estajiu. Aliende ne’e, hirus malu maibe nafatin buka meus hadia buat sira ne’e, hodi realiza ami – nia estajiu durante fulan tolu, atu atinji ami – nia metas ne’ebe agora hasoru dadauk.”
Durante estajiu, estudante sira halo peskiza la’o tuir uma kain sira iha aldeia Osogori, suku Uatu-Haco, atu foti dadus, halo sosializaun ba problema social, infraestrutura estrada, bee-moos, eletrisidade no seluk ne’ebe akontese iha komunidade.
“Maske ida – ne’e todan tebes, ami esforsu ho pasensia no servisu hamutuk, buat hotu sei la’o ho di’ak no susesu iha kada aldeia no suku. Tanba hakarak susesu, presiza pasensia hodi realiza mehi,” tenik Grinos.
Antes ne’e, estudante estajiariu husi postu Venilale ho Dosente UNPAZ, hatama karta konesementu ba Administrador Postu Administrativu Venilale, Jose Freitas Boavida no Xefe suku sira kona-ba estajiu durante fulan tolu,
Estudante estajiariu feto no mane tinan 2025, hamutuk 228 mesakBaucau-oan husi fakuldade 6 no departamentu 24, iha postu 6 kompostu husi Postu Administrativu Baucau, Vemase, Laga, Quelicai, Baguia no Venilale. (*)
