Reportajen : Joao Amaral Oqui.
OE-SILO (lifaupress) : Sarani kuaze na’in 360 resin partisipa Misa Kinta – feita Santa (17/04/2025) iha Igreja Sagrado Coracao de Jesus Oe silo, Rejiaun Administrativa Espesial Oe-cusse Ambeno (RAEOA).
Misa Kinta-feira Santa ne’e, ne’ebe Prezidi husi Padre Dominicus Nahak, SVD, partisipa mos husi Madre, Jestor, PNTL, UPF, Autoridade Suku sira, Katekista, Grupu Bairo sira, Grupu JDM no komunidade sira.
Iha nia Omilia, Padre Dominicus Nahak SVD hateten, sarani Katolika tomak iha mundu, selebra Kinta-feira Santa hodi hili Jesus nia ezemplu servi eskolante sira.
Amo Dominicus esplika, iha testamentu tuan, kor mutin ho Altar mutin, ho nia didin mos mutin , lian Hebreu sira dehan laiha modifikasaun. Kor mutin dehan lembos, nuudar simbolu pubreza, simplisidade ho servidor.
“ Selebrasaun Kinta – feita Santa, hodi hahi no hanoin akontesimetu sira, ne’ebe Jesus Kristu halo an hanesan atan hodi servi Nia eskolante sira, han hamutuk kalan ikus nian no fase Eskolante sira – nia ain, molok fahe malu ho mundo rai klaran,” Amo esplika.
Ba ema hotu iha mundu, Amo Dominicus hatutan, servi ema la’os buat foun, tanba hala’o ona iha ema idaidak nia moris lorloron. “Ita hotu Ita hala’o ona lorloron. Ezemplu, nuudar professor, ita sempre servi aluno sira. Nune’e, balun ne’ebe ho profisaun dotor, infermeiru/a, sempre servi povu no servi Sarani sira. Nune’e mos profisaun sira seluk, inklui nuudar Inan-aman,” Amo dehan.
Iha mundu karate servi dalaruma la dura tempu naruk. Tanba, espirirtu servu, la hanesan entre ema ida ho ema seluk. “ Balun hakarak servi ema, kuandu ema ne’ebe nia servi mos hafolin nia. Ne’e la hanesan ona saida mak Jesus hatudu, atu servi ema ho domin no konisensia tomak,” Amo hatete.
Jesus Kristu hatudu nia domin, servi Nia eskolante sira to’o rohan, fo Nia isin rasik atu Han, no fo Nia raan ba Nia eskolante sira atu hemu. Ne’e mak fo moris rohan laek.
“ Jesus hatene bainhira servi ho fuan, no ita servi ho sala Mak Ita loke. No fo tempu ba diabu sira atu kari fini aat, hirus, odio, resentimentu iha ita – nia servi Ida – ne’e,” Amo hateten.
Kondisaun ne’e, mak halo ema baruk atu servi ba malu, nuudar maun – alin, feton no naan. Jesus Kristu husu atu servi ba malu, labele aan sai patraun.
Iha Evanjellu hateten momoos katak, “ Halo hanesan buat nebe Hau halo, ne signifika katak iha maromak Nia oin, Ita hotu iha estatos hanesan nudar maromak Laos estado, ka profisaun maibe Sei Mak Nia Mak Sei Sai bot Liu.
Iha parte seluk, Amo selembra ba Sarani sira, katak Papa Fransisco iha Nia vizita mai Timor Leste, hatudu ona oinsa sai servidor ho fuan atan ida nian.
Alemde ne’e, bainhira vizita nasaun Sudaun, Amo Papa hakruk no rei prezidente no vise presidente Sudaun nia ain, hodi husu no haraik an atu sira labele halo funu hasoru malu.
“ Ukun na’in sira, labele foti aan, no egoezmu. Hanorin ba ukun na’in sira, atu fo ba povu sira hotu – nia Liberdade, hodi pasa ba dalan foun iha umanidade, no servi ba malu ho fuan ho laran,” Amo esplika signifikasaun husi Amo Papa rei ain.
Iha Knta-feira Santa tinan ne’e, Amo Dominicus dehan tan, Papa Fransisco fo mensajen ba sarani hotu, “ Ita Mak lia loos nebe katak (karino ou amor), servi ho fuan hanesan atan, importante liu, duke buka profisaun boot hodi sai ba patraun boot ba ema hotu.” (*)
