Reportagen : Celcia Magno
VENILALE (lifaupress) : Justinho Magno, ema ho defisiensia, obrigatoriu kontinua tur iha estrada ninin hodi husi ajuda, tanba osan subsidiu ho montante $180 la sufisiente ba nia nesesidade loron loron .
Tanba desidi rasik atu tur iha estrada ninin, Justino ho nia simplesidade la prekupa ho rai-rahun hafalun nia ulun oin, isin – lolon no la sente loron – manas, tanba deit hakarak hetan tan tulun husi ema sira liuhusi area Uaiula no Badulari’o, aldeia Lia oli, Venilale, Baucau, hodi uza ba nesesidade familia.
Husi laletek leten, fatin ne’ebe nia hela ba, Justino ho pasiensia la’o tun mai husi daderkedas. Nia dolar tun ba estrada ibun kada loron, husu tulun ba ema sira ne’ebe ba – mai diresaun husi Dili – Baucau no Vikeke.
Tuir observasaun www.lifaupress.com iha estrada publiku ne’ebe Justino tur ba, ema balun oferese hela tulun, maske la boot.
HAMUTUK– Justinho Magno, ema ho defisiensia tur hamutuk ho nia Inan, Tersa (11/6/2024) iha hela fatin. Foto LP Celia Magno
“Ha’u tur iha estrada ibun, hein ema fo mak foin simu. Loron ida, hetan osan dolar USD USD $20 to’o USD $30. Osan ne’e rai di’ak hola hahan no roupa balun, hodi hatais. Tanba osan difisiente ne’ebe simu la sufisiente ba nesesidade loron loron” Justino informa ba onlinewww.lifaupress.com iha fatin publiku estrada ninin area Badulari’o aldeia Lia-oli, Suku Bahamor, Postu Venilale, Baucau, inisiu semana ne’e, kuaze tuku 3:00 loraik OTL .
Maske ema barak liuhusi autorodade lokal.,nasional, Palasiu Prezidensial, no mebru governu balun, ne’ebe vizita defisiente ba Justino Magno atur labele tur iha dalan ninin ka fatin publiku, hodi husu tulun husi ema seluk, tanba hamonu difisiente sira-nia dignidade.
Maibe, Justino hatan : “ Ha’u osan la iha, atu husu ba se los mak atu fo? No tur iha uma deit halo saida mak osan iha? Tur iha dalan ninin, hodi hetan netik osan husi ema balun nebe ho konsensia fo netik uituan, hodi hola hahan hodi han .”
Nia mos husu ba ukun na’in sira atu hadia nia uma, nebe didin deit ho au no toba deit iha hadak leten nahe biti ida no sumasu ida.
ALIN — Luis Joao Magno, alin husi Justinho Magno iha entrevista ho www.lifaupress.com, Celia Magno, Segunda (10/6/2024) iha hela fatin. Foto LP Celia Magno
Entretantu, Luis Joao Magno, nuudar alin husi Justinho Magno ba online www.lifaupress.com hateten, maun Justino Magno rasik deside tur iha estrada ibun hodi husu tulun ba ema. “ Ami la haruka no lakoi atu tur iha dalan ninin, hodi husu ajuda nee,” Luis dehan tan.
Luis mos rekunhese, osan subsidiu ba difisiente ne’ebe Justinho Magno hetan durante tinan 10 ona, la sufisiente atu halo uma ba sira atu hela no hola nesesidade baziku. “ Nia husi kiik to boot ne’e, familia deit mak tau – matan inklui fo haris ,lori ba sintina no truka nia ropa kada loron.
Luis mos husu ba Governu atu hadia uma ne’ebe defiensia hela ba tanba ladun saudavel.Durante ne’e, familia hato ona proposta ba Governu kona – ba Justinho Magno nia problema, maibe seidauk iha resposta.
Xefi Aldeia Lia-Oli, Selestino Eduardo Magno
Entretantu Xefi Aldeia Lia-Oli, Selestino Eduardo Magno ba www.lifaupress.com, Kuarta (12/6/2024) hateten, durante ne’e nudar autoridade legal fo atensaun ona atu labele tur iha Estrada ninin.
“ Maibe to’o agora nia sei kontinua ba tur estrada ninin, tanba dehan nia nesesidade. Maibe presiza resolve, atu nia tur iha fatin seguru no dignu. Tanba tur iha Estrada ninin, perigu ba nia vida tanba kareta halai tun-sa’e,” Xefe Aldeia, Selestino Eduardo Magno reafirma.
Justinho Magno moris iha loron 14 fulan Maiu tinan 1978, maihusi aldeia Lia oli, Suku Bahamori, Postu Administrativu Venilale. Nia nuudar ba daruak husi maun alin nain 3 ho aman Joao Silveiro Magno ( Matebian) no Inan Albertina Magno. (*)
