Reportajen: Selestinho Mani Falo
Natalia de Jesus
DILI (lifaupress) : Abilio Elo, iha Aitarak-laran, suku kampung Alor, Postu Administrativu Dom Aleixu, munisipiu Dili, sei la hela kleur tan ona iha fatin ne’e. Tanba, iha loron Segunda-Feira, (03/06/2024) ekipa Diresaun Nasional Teras Propriedades (DNTP) tau ona marka ba nia uma, ho númeru 268.
“Ohin ha’u hetan markasaun númeru ba ha’u – nia uma husi ekipa DNTP, nuudar sinal ida atu obrigatoriu hamamuk hela fatin ne’e to’o loron 30 fulan Juñu tinan 2024,” Abilio esplika ba jornalista www.lifaupress.com, iha nia hela fatin, Aitarak-laran, Dili.
Nia haktuir, ekipa DNTP hala’o markasaun númeru ba kada uma kain sir husi Segunda-feira (27/05/2024) to’o Sexta-Feira (31/06/2024), hahu husi númeru 1 to’o 254.
“ Ohin sira kontinua halo kontinuasaun to’o ami – nia hela fatin. Dokumentu ne’ebé sira presiza mak fixa familia no kartaun eleitoral,” Abilio esplika tan.
Komunidade sira iha area ne’e, kontinua koopera ho Governu, atu kria dezenvolvimentu ba nasaun Timor-Leste.
“ Maibe ha’u triste tebes, tanba hela hamutuk ho estudante na’in 4, ha’u atu halo oinsa? Atu lori sira ba hela iha ne’ebé? Sira atu hela Kos, maibe sira sei la iha kapasidade atu selu Kost to’o remata estudu. Osan trasporte deit ha’u mak ajuda sira, sa tan atu selu Kos ” nia dehan.
Estudante sira – ne’e hala’o estudu iha Universidade hotu hanesan UNTL, ICS, UNITAL no UNDIL.
Abilio Elo husi aldeia Nibin, suku Usi Taqueno, postu administrativu Oe Silo, Reziaun Adminidtrativu Espesial Oe-cusse Ambenu (RAEOA) mai iha kapital, atu buka moris liuhusi harii kompaña ho naran SIBUN AIR SERVICE.
Enkuantu Xefe aldeia Anin-fuik Aitarak-laran, Franselino Maia esplika, tuir notifikasaun husi DNTP ba komunidade Aitarak-laran, loron 30 Junho 2024 tenke husik ona hela fatin.
Determinasaun tempu ne’e, sai obstaklu ba komunidade sira iha area ne’e. Tanba sei too tempu ne’ebe determina mak seidauk iha biban atu, no Governu obriga sai, signifika Governu la hanoin estudante sira ne’ebe sei kontinua hela estudu iha kapaital.
“Governu presiza kria uluk kondisaun diak ba estudante sira, tanba estudante barak mak hela iha Aitarak-laran, hahu husi pre-primaria to’o universidade. Governu rasik hatene katak, estudante sira mak futuru nasaun. Sira mak na’in ba dezenvolvimentu nasaun ,” nia hateten. (*)
