Reportajen: Selestinho Mani Falo
DILI (Lifuapress) Bergilio Falo husi aldeia Hautefu, suku Ban-afi, postu administrativu Nitibe, Reziaun Administrativu Espesial Oe-cusse Ambenu (RAEOA) hapara nia eskola tanba nesesidade obriga deside fa’an pentolan atu sustenta familia.
“Ha’u deside hapara ha’u nia eskola hahu tinan 2021, até agora,tanba ha’u tenke buka osan, atu ajuda selu maun nia eskola ho bin no mos sustenta nesesidade uma laran”, Bergilio dehan ba jornalista www.lifaupress.com, Tersa-Feira (04/06/2024) iha rotunda Nicolau Lobatu, Comoro, Dili.
Antes fa’an pentolan, Bergilio eskola iha EBC Banaef Manat, aldeia Neof Metan, suku Ban-afi, Postu Amdinistrativu Pasabe, RAEOA.
“ Ha’u sai iha klasse 7 ano, exame primeriu peridu hotu. Tanba haree ha’u – nia maun tama ona universidade iha UNTL, inan – aman kbi’it laiha ona atu selu no maun eskola iha Dili, hela iha kost no mos abin prepara atu tuir exame nasional iha tinan kotuk, tenke hatama osan no dadauk nee mos bin tuir hela kursu iha Oe-cusse, entaun hadia desidi sai husi eskola hodi buka osan, “ nia hatete.
Husi Oe-cusse, Bergilio la’o mai rai-boot, liuliu iha Dili, kapital Timor-leste hodi buka servisu.
Sorti di’ak, konsege hili servisu fa’an pentolan. Haleu Kampung baru, Comoro, tama to’o Beto no loraik para iha merkadu kampung Baru, area rotunda Nicolau Lobatu, Comoro.
Servisu ne’e todan, maibe tenki pasiensia. Nia maun, sempre ajuda prepara material sira ne’ebe atu fa’an. “ Kalan ha’u-nia maun sona tahu no dadersan ha’u ba dulas na’an iha merkadu Comoro. Fila mai mak halo fali na’an nee sai fali pentolan,” nia esplika.
Baibain, sosa na’an kilograma ida ho folin USD $ 7. Husi modal ne’e, nia jere ba pentolan. No loron nia hetan osan minimu USD $25 no maximu USD $ 30.
Material ne’ebé mak nia uza mak mina rai, konfor, karosa no kaneka boot atu tau saus, duut, salsa, mina bimoli atu sona tahu no apita pentolan.
“Ita fa’an ne’e, sorte deit mak ema sosa hotu. Dalaruma ha’u lori balun ba fali uma. Kuandu la hotu hotu, dalaruma ha’u hetan de’it osan USD $ 14/ ka USD $ 15 USD, ” nia afirma.
Durante iha Dili, Bergilo hela hamutuk ho nia maun iha uma Raihun, Aldeia 4 de Setembru, Suku Comoro, postu Dom Alexu, Dili. (*)
