Reportagen: Osterlia Muni.
DILI – (Lifaupress) : Komite Reguladora Arte Marsiais (KRAM) husu ba Diretor Eskola sira no Organizasaun Arte Marsiais (OAM) hapara membru sira uza atributu arte marsiais, bazeia ba Rezolusaun Governu Numeru 42/2023.
Prezidente Komite Reguladora Arte Marsiais (KRAM), Octavio da Conceição husu ida-ne’e, tanba Polisia Nasinal Timor-leste, Komamndo Polisia Aileu, kaptura membru arte marsiais balun ne’ebe utiliza atributu arte marsiais iha Suku Lahae, Postu Administrativu Aileu, area Daisoli bainhira partisipa peregrinasaun ba Na’in Feto Ramelau, Ainaro, loron 07 Junho 2025.
“ Hahalok husi membru arte marsiais ne’e, la obedese ba Rezolusaun husi Governu, liuliu husi membru Organizasaun Arte-Marsiais (OAM) Persaudaraan Setia Hati Terate (PSHT) no Inkatan Kera Sakti (IKS),” Prezidente Komite Reguladora Arte Marsiais (KRAM), Octavio da Conceição reafirma ida-nee iha Salaun KRAM Lesidere, Dili,Terca Feira (17/06/2025).
Octavio da Conceição reafirma, Nonu Governu Konstitusionál sei kontinua suspende pratika Aktividade Arte-Marsiais nian iha ita nia teritóriu Nasionál.
“Ita – nia jovens sira ne’ebé ho motor, utiliza farda OAM no pasang fali sira – nia jurus. Tanba ne’e, ita – nia PNTL Munisípiu Aileu kaptura sira iha Area Daisoli, Postu Administrativu Aileu Munisípiu Aileu, ” Octavio hateten.
Iha parte seluk, nia mos informa, Autoridade Migrasaun mos asegura no prende Farda OAM PSHT no IKS, ne’ebé mai husi rai-liur, Segunda (16/6/2025). “ Aktu sira ne’e ita konsidera hanesan infrasaun ou inkomprimentu legal ba Estadu – nia orden,” nia dehan tan.
“Ami husu dirijenti eskola no lideransa Arte-Marsiais sira, atu kolabora ho Autoridade seguransa, liu-liu Ofisiál Polísia Suku (OPS) sira, hodi kumpri nafatin rezolusaun ne’ebe Governu fo sai. Ita hein to loron 31 Dezembru 2025.” Nia dehan. (*)
