Reportagen: Jerino F.B.P.Bere/Joao A.Oqui/Damiano Oni
OE-CUSSE (lifaupress): Komunidade Bairo Aos-Ero,Aldeia Tulaika, Suku Lifau, SUb Rejiaun Pante Makasar, RAEOA, Kuinta-feira (30/01/2025) husu Governu atu tau – matan ba Uma neebe afeitadu sira kuaze uma 12 tamba durante ne’e abandonadu hela.
“Ami husu ba Governu atu tau – matan ba uma afeitadu sira husi konstrussaun estrada. Tamba besik ona tinan rua, konstrusaun uma ne’e seidauk remata. Governu tenke halo hotu uma sira – ne’e “ Daniel Falo informa ba www.lifaupress.com.
Nia rekunhese, durante tempu udan, rezidenti sira terus. Ami sente araska, tamba ami hela de’it iha dapur . Uma neebe halo ho emerjensia la hanesan uma konstrui ho planeadu.
Tuir kalendariu konstrusaun, durasaun harii uma afetadu sira atinji fulan 6 de’it. Maibe besik tinan 2 ona, seidauk konklui.
“Ami seidauk uza, tanba seidauk inagura. No pior litan, uma afeitadu balun abandonadu. Balun nakfeira ona,” nia dehan tan.
Entretantu, Xefe Bairo Aos-Ero, Domingus Anin esplika, Governu destribui uma sira – ne’e, nuuidar uma selu Uma (ganti rugi).
Nia mos rekunhese durante konstrusaun uma sira – ne’e, fulan neen. “ La hatene tarde husi ne’ebe? Karik material konstrusaun la iha mak projetu seidauk hotu? Komunidade balun hela de’it iha sira – nia dapur. Besik ona tinan rua, konstrusaun seidauk hotu,” nia dehan.
K Domingus Anin mos ejiji ba Governu atu finaliza lalais konstrusaun sira ne’e. “ Populasaun sira terus, tamba hela hamutuk ho bikan no sanan iha uma emerjensia de’it,” nia dehan. (*)
