Reportajen : Anagracia/ Maria Feno/Eva
DILI (lifaupress): Diretor Jéral Sekretariu Estadu Formasaun Profisional no Empregu (SEFOPE), Carlito Rosario Carvalho ba Jornalista sira iha Suai room Timor Plaza, Comoro, Dili, Segunda-feira (13/5/2024) informa, nasaun Japaun presiza tan traballador timoroan atu servisu iha area agrikultura, industria ró no area seluk tan.
Fulan hirak liuba, ekipa Sefope vizita ona traballador na’in 14, hodi hare besik sira-nia kondisaun servisu iha area agrikultura. Kompañia industria ro mos asina MoU ho Timor-leste no fulan kotuk fo tèste kedas ema na’in 35. Husi nemrtu ne’e , sira foti uluk na’in 10 no agora preparadu hela atu ba servisu iha provinsia Fugu Hyama, Japaun.
” Traballador Timoroan na’in 14 agora servisu iha provinsia Cotchi. Fulan kotuk kompanhia ida husi Japaun, simu tan na’in 10 atu servisu iha industria ró, hafoin liutiha teste iha sentru formasaun Tibar, Likisa,” Diretor Jéral Sekretariu Estadu Formasaun Profisional no Empregu, Carlito Rosário ba jornalista Lifau Press no Indepedente no hafoin serimonia asina deklarasaun ba Traballador 82 atu ba servisu iha Australia.
Nia mos dehan tan, tempu badak sei rekruta tan traballador ba area agrikultura, liuhusi asina memorandu kooperasaun ne’ebe konsidera business to business.
” Kompanhia husi Japaun kontente, tamba Governu rasik mak sei kaer prosesu sira, entaun sira prontu hein simu ita – nia traballador no fo formasaun dalen Japaun,” nia dehan tan.
Kona-ba sistema rekrutamentu, dia dehan, hanesan mos sistema ne’ebe implementa ba Korea du Sul no Australia. Diferenti iha Japaun mak molok servisu definitivu, tenki partisipa lai treinamentu, kursu dalen Japaun no tekniku uituan.
Traballador sira ne’ebe ba Japaun, hetan kontratu ba tinan 3-5. Bainhira hatudu komportamentu diak no badinas servisu, kompaña sei presiza sira, posibilidade bele renova kontratu.
Atualmente, traballador ba Japaun seidauk regula selu taxa ba estadu. Maibe ba oin presiza iha kontribuisaun taxa ba nasaun Timor – Leste. (*)
