Reportajen : Nélia de Jesus Correia Soares
ULMERA (lifaupress): Sarani Católica Ulmera kuaze atus 500, partisipa Selebrasaun Misa Domingo Ramos, Domingu (13/4/2025) iha Capela Centro Pastoral Sagrado Coração de Jesus, Ulmera, Bazartete, Liquiçá.
Misa Domingu Ramos ne’ebé prezide husi Pe. Abel, SJ, atu hanoin hikas momentu Jesus Kristu tama ba Jerusalem.
Selebrasaun Eukaristia Domingo Ramos ne’e, hahú ho orasaun entrada no prosesaun husi Sede Aldeia Essirat ba Kapela Sagrado Coração de Jesus, Neran, Ulmera, lidera husi Acólitos, Padre selebrante, Korro, Eskuteirus, membru THS-THM no mos sarani sira.
Iha primeira Leitura foti husi Livru Profeta Isaías ne’ebe hateten, “ Maromak mai tulun ha’u, nune’e ha’u la moe lerek”. No segunda Leitura husi São Paulo nia surat ba Sarani sira iha Korinto, ne’ebé hateten “Jesus mai iha mundu nu’udar mane loloos hodi mate iha Krus, nune’e Aman Maromak haraik ba nia naran ida boot liu iha rai klaran”.
HEIN BENSAUN : Sarani sira hamrik nakonu iha kapela Centro Pastoral Sagrado Coração de Jesus Ulmera, nia oin hadi hein bensaun husi Amo celebrante, Pe. Abel, SJ, Domingu (13/4/2025). Foto dok. Bernardino Soares, Sek Suku Ulmer, Bazartete, Likisa.
Entreatntu Evanjellu foti husi livru São Lucas, ne’ebé akontese diálogu entre Jesus nia eskolante sira, Fariseu no soldadu sira, no mos feto Jerusalem sira. Iha ne’ebé konta kona-ba Jesus nia viajen ba Jerusalem, han kalan ikus ho nia eskolante sira, saran-an ba mate iha Kruz, no moris hias husi mate.
Iha omilia, Pe. Abel, SJ hateten, Jesus mai iha mundu ne’e ho haraik-an, liurai ida-ne’ebé la foti an no simples, halo an ba ema loloos hodi terus no mate iha Kruz atu kasu ema husi sala. Iha fraze ikus, selebrante hatete “ami akompaña Jesus nia mate ho esperansa Nia sei moris fali iha loron tolu nia laran”.
SARANI NAKONU IHA KAPELA : Sarani sira balun obreigatoriu hamrik deit iha lier, tanba Kapela Nakonu durante Misa Domingu Ramos iha kapela Centro Pastoral Sagrado Coração de Jesus Ulmera, Domingu (13/4/2025). Foto dok. Bernardino Soares, Sek Suku Ulmer, Bazartete, Likisa.
Ritu sira iha selebrasaun ida-ne’e la’o ho diak, tanba iha Padre ne’ebé halo reflesaun di’ak los, Acólitos na’in 11 (kompostu husi mane 6 no feto 5) ne’ebé matan moris no atentivu iha ajuda Misa, sarani sira kolabora di’ak ho seguransa sira (Eskuteirus no membru THS-THM) konsentra de’it ba seguransa Misa ne’e, maske dura oras 2 nia laran, hahú husi tuku 08:00 AM to’o tuku 10:00 AM.
Antes taka Misa, Secretário Centro Pastoral no Katekista Capela nian, fo sai avizu kona-ba orariu Misa sira no mos apostolu ba fase ain iha Kinta-Feira Santa nian. (*)
