Reportajen : Avelino de Menezes/ Paula
DILI (lifaupress) : Sarani sira kuaze rihun ida partisipa Misa Domingu Ramos iha Igreja Parokia Sagrada Corasaun de Jesus, Becora, Dili, Domingu (13/4/2025) hahu tuku 07.30.
MISA DOMINGU RAMOS : Sarani sira seriu partisipa Misa Domingu Ramos, Domingu (13/4/2025) iha Igreja Parokia Sagrada Corasaun de Jesus, Becora, Dili. Foto LP/Avelino
Misa Domingu Ramos ne’ebe prezidi husi Pe. Bernardo Pereira Domingos Paiva,hodi banate tuir tradisaun povu Ebreu sira ne’ebé simu Jejus iha Jerujalem, haklalak no hananu.
Iha omilia, Administradór Paroqual, Pe. Bernardo Pereira Domingos Paiva, esplika,Domingu Ramos hanesan Domingu ikus Paskua, ne’ebé Jesus Cristo terus iha Cruz, terus no mate no moris hias hodi kazu ema nia sala.
“ Husi Jesus Cristo – nia terus, mate to’o moris hias ne’e, atu salva ita ema iha mundu nia sala hotu,” Pe. Bernardo Pereira Domingos Paiva hateten.
Pe. Bernardo Pereira Domingos Paiva mos husu ba sarani sira, atu iha SemanaSanta ida – ne’e, hakribi sala, perdua no hadomi malu hodi moris iha dame nia laran.
Tuir observasaun, desde Misa hahú husi Bensa Ramus iha kampu Basket Ball Eskola Sagrada Corasaun de Jesus nia no prosesaun ba Igreja laran too Misa remata, la’o ho di’ak, tanba hetan seguransa husi Grupu Soldadu de Cristo ho seguransa Polísia Nasionál Timor-Leste, Eskuadra Cisto Rei, Dili, kolabora ho sarani sira.
Entretantu durante Misa, jestaun movimentu transporte iha estrada publiku mos la’o di’ak, hodi asegura partisipasaun Sarani sira durante Misa Domingu Ramos. (*)
