Reportajen. : João Pereira de Oliveira/ Senhorina Pereira Ximenes
COMORO (lifaupress) : Sarani Parokia Maria Auxiliadora Comoro selebra missa Domingo de Ramos iha Igreija Parokia Comoro, Dili, Domingo (13/01/2025) atu relembra Jesus sa’e ba Jerusalém.
Domingo de Ramos hanesan inísiu semana Santa, nunee halo Ita atu kontempla fali Jesus sa’e ba Jerusalém, ema hotu haklalak no hananu hodi dehan Hosana David Nia oan.
Misa Domingo Ramos ne’e, prezidi husi Padre João Maria Roque Guterres, SDB no Co-selebrante husi Padre Acácio de Castro, SDB.
Iha omilia, padre selebrante João Maria Roque Guterres, SDB hateten, Domingu Ramos, nuudar loron reflesaun ba sarani tomak iha mundu, hodi hanoin hikas ba ema hotu kona-ba Na’i Jesus Kristo nia terus no mate tan de’it nia povu.
“Loron ohin, ita hotu no mundu tomak halo reflesaun no hanoin hikas Na’i Jesus Cristo nia terus no mate, tan de’it nia povu. Nia oferese aan tomak ba mate, hodi fó Salvasaun ba nia emar tomak iha mundu,” Pe. João Maria Roque Guterres, SDB.
PREZIDI MISA : Pe. João Maria Roque Guterres, SDB preside hela Misa Domingo Ramos, Domingu (13/4/2025) iha Igreja Maria Auxiliadora Comoro, Dili. Foto LP/ Joao Pereira de Oliveira.
Iha parte seluk, Pe. João Maria Roque Guterres, SDB dehan, “Ita – nia peregrinasaun tempu Kuarezma husi Kuarta Feira Cinzas, to’o ohin, tama daudaun ona ba semana Santa. Ohin, Paixão Domingu de Ramos, ita hanoin kona – ba Jesus nia terus no mate.”
Amo João Maria Roque Guterres, SDB mos dehan tan, Domingo Ramos iha liafuan tolu neebe importante atu Sarani hotu reflete.
Primeiru, Jesus Cristo halo orasaun iha to’os Oliveira, ilha ne’ebe Jesus hatene ona katak, Nia sei terus no mate iha Cruz. Segundu, Pedro, Jesus Nia eskolante ne’ebe nega no la rekonhese Jesus bainhira ema husu Jesus ba nia, maske ikus Nia arepende no rekonese fali nia nega duni ba Jesus. Terseiru, bainhira ema Hedi Jesus iha Cruz, iha Cruz leten Jesus hateten, Aman, iha Ita Liman Ha’u saran Ha’u an. no Jesus dehan Tan Aman perdua Sira tanba Sira la hatene saída Mak Sira halo.
Iha Evenjellu hateten, Jesus tama ba Jeruzalem hanesan Liurai bo’ot ida, ema haksolok, haklalak simu Na’i Jesus. Nia tama ba ema Israel hodi simu Aisanak Oliveira, hahi, hanai sira – nia Liurai David, Hosana David nia oan.
Iha segunda parte husi Evanjellu, hateten, Na’i Jesus nia Paixão kona – ba nia terus no mate, ba halo orasaun iha Toos Oliveira no hatene ona nia sei hasoru difikuldade, problema no terus.
Padre João Roque, SDB mós husu sarani sira atu labele moris iha nakukun laran, maibe haree no introspeksi an, atu bele selebra Páskua ne’e ho fuan no laran moos.
Tuir observasaun, Misa Domingo de Ramos ne’e hetan partisipasaun maxima husi sarani , relijiozu no relijioza sira. Kuaze tuku 06.00 dadersan, sarani barak mak hahu hakbesik an ona ba resintu Igreja Parokia.Tuir orariu, Parókia ne’e selebra misa ba Domingu Ramos dala tolu. Misa primeiru, hahu tuku 07:30, Segundu misa, hahu tuku 10:00 no Terseira Misa hala’o iha tuku 17:30. Iha primeira missa hahu ho bensaun ba Ramos iha Uma-Laku, depois prosisaun ba Igreija laran no kontinua kedas ho Santa Missa. (*)
