Reportajen : Antonio Eco
MOTAEL (lifaupress) : Ema sira ne’ebe simu ita – nai Jesus ho Olivera tahan matak,simu ho vitoria no esperansa iha tradisaun Judeu nian nudar sinal boot Gloria no Vitoria nian.
Amu Parokia Santo Antonio de Motael, Padre Guilhermino da Silva hateten ida-ne’e iha nia Omilia selebrasaun Domingo Ramos, Domingo (13/4/2025) iha IgrejaParokia Santo Antonio de Motael, Dili.
Tuir Padre Guilhermino da Silva, semana ne’e tama semana Santa, loron importante tebes ba Sarani sira atu selebra Santa Paskua ho furak iha fiar Kreda nian.
“Iha liturgia loron ohin, ita hare akontesimentu bo’ot rua – ne’ebé ita halo selebrasaun bensa Ramos ne’ebé ita hit sae ita – nia Ramos tahan matak ba Jesus tama Jerusalem hanesan Liurai no ita rona nai Jesus nia paisaun ne’ebé roman iha krus ksolok, simu Liurai hosana nabilan hodi hedi nia ba Krus,” Padre Guilhermino da Silva dehan.
Iha partse seluk, Pe. Guilhermino husu tanbasa Sarani sira selebra Domingo Ramos? “ Igreja hakarak afirma loloos katak, Jesus mak Liurai. Maibe, la’os Liurai mundu nian ne’ebé mai ho forsa politika. Jesus tama ho nia kuda buru ho sinal haraik an no dame nian.
Jesus nia vitória la’os tuir mundu nia maneira, maibe liu-husi terus no lori Kruz todan. Nune’e, Domingo Ramos nuudar dalan ba salvasaun, la liuhusi dalan ne’ebé kaber no luxu, maibe dalan ne’ebé nakonu ho sakrifísiu no fidelidade.
“Ohin ita selebra Domingo Ramos, la’os memoriza fali akontesimentu pasadu,maibe atu hafoun ita – nia komprimisiu iha ita – nia fiar ba Kristu. Haksolok la’os iha momentu di’ak maibe fiar nafatin iha momentu sira ne’ebé ita tenke lori Kruz, ” nia dehan tan.
Tuir observasaun, ambitu selebrasaun Domingo Ramos la’o diak, tanba hetan seguransa maximu husi autoridade Polísia Nasionál Timor-Leste (PNTL), joven Eskuteiru sira, no koopera di’ak ho sarani sira. (*)
