Reportajen: Selestinho Mani Falo
DILI (Lifaupress) Timor oan na’in 58 (feto 4, mane 54), Kinta-Feira (20/06/2024) halo despedida ho governu Timor-leste liu husi SEFOPE atu haruka tan ba Australia atu servisu ba area agrikultura.
“Ohin ita halo despedida no assina deklarasaun entre inan aman, governu Timor-leste no traballador sira atu ba servisu iha Australia kona-ba area agrikultura, sira sei aranka iha loron 22/06/2024 tanba visa mai to’o ona”, dehan diretor jeral SEFOPE, Carlito Rosalio Cabral, iha Salaun Beach Garden, Pante Kelapa, Dili.
Nia haktuir, Sekretariu Estadu Formasaun Profisional Empregu (SEFOPE) semrpre halo despedida no asinatura bainhira traballador sira atu ba servisu iha Australia no ida nee hanesan biblia ida ba traballador sira.
“Traballador sira tenke kumpri regra ne’ebe SEFOPE liu-liu labele ses husi sistema no labele lori arte ritual no arte rituais ba iha Australia atu fó trenu/hanori ema iha nasaun Australia tanba akontesimentu iha Portugal hanesan referensia ida ba imi sira ne’ebe atu ba servisu iha ema nia rain” nia husu.
Nia informa, relasiona ho traballador sira ne’ebe mak ses husi sistema kuaze 800 tal tanba kontratu badak, maibe la konsidera katak ilegal, importante labele komete krime tanba kompaña sei fó oportunidade ba sira atu servisu to’o kontratu hotu tenke fila.
“Ita iha esforsu liu husi adidu ho kompaña atu hanaruk sira nia kontratu hanesan tinan 1, 2 no 3 atu nune’e traballador sira labele ses husi sistema”.
Entretantu diretor DNE SEFOPE, João Correia, Nia haktuir, Traballador sira nee maoria husi rei entre/ba mai ema na’in 49 tanba konfiansa husi kompaña, foun ema na’in 9 no foun ne’e ita nia númeru menus itoan tanba epregador sira aumenta visa no prolonga tempu naruk hanesan tinan 3 ho ida ne’e mak numeru foun menus.
“Hau espera ita bo’ot sira ohin assina ne’e sei foti imi ba tempu naruk. Traballador balun la gosta ba tempu naruk, sira hakarak kontratu fulan 9 hotu tenke fila mai Timor no ha’u hato’o parabens ba imi hotu liu-liu sira ne’ebe mak ba mai, bom servisu”, nia afirma. (*)
