Reportajen:Ana Graciana Soares
DILI (lifaupress): Diretora Ezekutiva FOKUPERS, Domingas Afonso Amaral informa, husi Janeiru to’o Juñu 2024, FOKUPERS rejistu kazu Violensia Domestiku hamutuk 131. Husi kazu sira ne’e, vitima barak mak lakon esperansa tanba prosesu lori tempu naruk iha parte Justisa nian.
Diretora Ezekutiva FOKUPERS, Domingas Afonso Amaral hato’o ida ne’e ba jornalista sira, Segunda-feira (08/07/2024) hafoin enkontru Rede referal iha Sekretáriu Estadu Igualdade Caicoli, Dili.
“Tipu kazu ne’ebe ás maka violensia doméstika, ho tipu violensia fiziku. Tanba de’it prosesu kazu ne’e lao tempu naruk, entaun dala-ruma vitima balun hili atu dada fali sira – nia kazu, tanba sente prosesu nee kleur. Depois vitima tenke hela iha uma mahon no autor mak livre hela iha liur. Ne’e mos prejudika vitima sira, “Jestora FOKUPERS, Domingas Afonso bhateten.
Nia esplika tan, tanba prosesu justisa kleur, vitima sira ezize tenke fila ba uma hodi kontinua halo sira – nia moris, hanesan babain. Entaun Uma Mahon empodera sira durante sira hela iha ne’eba no fasilita sira ho treinamentu,”nia klarifika
Durante iha Uma Mahon, laos vítima de’it mak iha hela iha fatin ne’e, maibe FOKUPERS mos akomoda ho dependensia hamutuk 85 mak labarik tuir nia inan sira.
“Wainhira violensia akontese, inan sira la’os mai mesak maibe mai ho oan sira. Entaun iha Uma Mahon, ita fornsese apoiu integradu, asegura sira nia toba fatin ho seguru, hahan saudavel, apoiu pisko-sosial atu rekupera fali sira hosi trauma,” nia esplika.
Hafoin rekopera psiko social, vitima rasik mak deside atu prosesu kazu ne’e ba prosesu legal ka la kontinua prosesu.
Durante ne’e, FOKUPERS la halo intervensaun ba vitima sira, maibe servisu no kontinua fo apoiu pisko-sosial, hamutuk ho Uma Mahon. (*)
